Pedaladas pide que non se usen ós ciclistas como arma no conflito laboral da Policía Local
Por Oskar Viéitez
A asociación Pedaladas vén de emitir un comunicado no que anuncia que vai solicitar unha reunión cos representantes sindicais da Policía Local para pedirlles que non se use aos ciclistas como arma da negociación laboral.
Ademáis, o grupo municipal do Partido Popular solicitoulles unha reunión para falar dunha moción que vai levar a Pleno para a redacción dunha ordenanza que regule o uso das bicicletas. Este xoves representantes de Pedaladas acudirán a esta reunión pero xa adiantan que "non apoiaremos ningunha moción que teña un uso partidista ou que busque alimentar un conflito xa que entendemos que a regulación da bicicleta debe abordarse dunha forma seria e coherente".
Este colectivo ciclista lembra que leva anos traballando estreitamente co Concello de Pontevedra e coa Policía Local para mellorar a seguridade e a convivencia entre os diferentes modos de desprazamento na cidade.
RESPOSTA AOS SINDICATOS DA POLICÍA LOCAL
Dí Pedaladas que a súa asociación ten no seu Plan de Mobilidade Ciclista de Pontevedra a necesidade dunha ordenanza de mobilidade similar a que teñen cidades como Málaga, Barcelona, Vitoria, Zaragoza, Sevilla... "pero non estamos de acordo en que se nos use como arma nun conflito laboral".
Afirman que dende a súa asociación sempre traballaron en mellorar a convivencia e conseguir que os ciclistas gañen a calzada xa que é o lugar por onde deben circular ás bicicletas.
"Os datos da propia Policía Local do 2014 dispoñibles na páxina web da DXT non mostran o conflito que din os representantes sindicais no seu comunicado. Entre vías urbanas e interurbanas os datos din que os ciclistas sufriron 2 feridos graves e 25 feridos leves no conflito ciclista- automóbil mentres só temos constancia de dous peóns feridos leves nun conflito ciclista-peón mentres que as vítimas atropeladas ascenderon a 2 falecidos, 8 feridos graves e 46 feridos leves sendo o conflito automóbil peón o que está a ser realmente preocupante atendendo aos datos".
"Os datos reais non mostran o grave conflito de convivencia polo que lle solicitamos aos representantes sindicais da Policía Local que teñan responsabilidade nos seus comunicados xa que están culpabilizando a un colectivo vulnerable".
Na asociación Pedaladas aseguran que están preocupados "porque se poña na picota aos ciclistas novatos ou menores" que aínda non teñen habilidade para circular pola calzada "e que se senten intimados pola actitude agresiva de algúns condutores. A forma de reducir os ciclistas sobre as beirarrúas é mellorar a seguridade, mellorar a súa confianza, conseguir que se sintan respectados e que os condutores de automóbil cumpran de forma moi maioritaria a normativa vixente, sobre todo o metro e medio de separación lateral mínima nos adiantamentos e cremos que niso debemos estar xuntos os ciclistas e a Polícia Local", apuntan nun comunicado.
Esta asociación tamén considera que a problemática existente de que algúns ciclistas están facendo un "uso abusivo e inxustificado" das beirarrúas, dos contrasentidos e da velocidade excesiva dentro do espazo con preferencia peonil ten a mesma solución que no caso dos condutores de vehículo a motor que poñen en perigo manifesto aos ciclistas e esta solución é "sancionar aos ciclistas incívicos". "A sanción aos ciclistas incívicos ten e terá sempre o apoio da asociación Pedaladas".
Relacionadas:
-
Plataforma única ata a avenida de Lugo, entre as peticións de Pedaladas ao Rei Mago Miguel Anxo
Por Alejandro Espiño |
-
Búscanse activistas contra a violencia viaria
Por Redacción |
-
O Concello tramita a compra dun radar para a Policía Local
Por Redacción |
-
Da Silva pide aos delegados da Policía Local que "se comporten" para non danar a imaxe do corpo
Por Alejandro Espiño |
-
Representantes da Policía Local reclaman ao goberno de Lores a regulación dos ciclistas
Por Redacción |
-
E ti, sabes circular en bici pola cidade?
Por Redacción |
-
Pedaladas pide axudas para que nenos con discapacidade teñan unha bici adaptada
Por Redacción |