As chuvias darannos un respiro; o frío, xa tal
Por Redacción
As choivas dos últimos días tomarán un respiro na xornada deste martes 22 de novembro. Pero será mellor que non gardemos os paraugas moi lonxe, porque as precipitacións regresarán, segundo as predicións de Meteogalicia, previsiblemente na noite do mércores. Iso si, parece que o frío chegou para quedar.
Meteogalicia explica que Pontevedra presentará ceos con alternancia de nubes e claros nos próximos días. Así se manterá, polo menos, ata última hora do mércores. Nese momento regresarán as precipitacións, que continuarán durante todo o xoves.
O venres, con todo, de cara á fin de semana, regresará o sol e subirán lixeiramente as temperaturas.
Ata entón, as temperaturas manteranse baixas, especialmente as máximas. Durante os tres próximos días, os termómetros non superarán os trece graos en Pontevedra e as mínimas oscilarán entre os cinco e os oito graos.
Ademais, os ventos soprarán frouxos de compoñente norte durante os próximos días.