Poio defende a xestión "totalmente transparente" da súa Festa do Mar
Por Redacción
O Concello de Poio reitera que a súa xestión da Festa do Mar foi "totalmente transparente" e que o gasto que se fixo durante a súa celebración e público porque o goberno municipal "non ten nada que esconder". É a súa resposta ás críticas feitas polo PP sobre as prácticas presuntamente irregulares e opacas nas contratacións realizadas de cara a esta festa.
Os populares aseguran que as facturas suman, polo momento, máis de 206.000 euros. Ademais, denuncian que ningún gasto foi informado polo servizo municipal de contratación, que varias das facturas presentadas poderían representar prácticas irregulares e que algúns dos importes e conceptos incumpren os principios da xestión directa dun evento coma este.
Desde o Concello sinalan que as acusacións do PP son "infundadas", xa que as contratacións realizadas durante a Festa do Mar, non tiveron que pasar por ningún negociado de contratación ao non exceder ningún contrato ou factura a cantidade de 21.780 euros (IVE engadido) que marca a Lei de Contratos para as administracións públicas.
O concelleiro de Turismo, Xosé Luís Martínez, sinala que as actividades musicais da Festa do Mar organizadas directamente polo Concello supuxeron un gasto de 66.457,99 euros e non os 132.000 euros denunciados polo PP.
Ademais, o Concello colaborou con asociacións e clubs que organizaron as súas propias actividades, entre eles a ACDeM Armadiña. No festival Armadiña Rock, o Concello aportou tres dos dez grupos que participaron, ademais de colaborar en parte da produción, dos camerinos, e dos equipos de son, entre outros. Os grupos cos que colaborou o Concello de Poio dentro do festival Armadiña Rock foron: Banda Basotti, Siniestro Total e Sés.
Este ano, recordou Martínez, o Concello de Poio optou pola xestión directa dun dos principais apartados da Festa do Mar como é a Mostra Gastronómica. Para levar a cabo esta mostra, o Concello contou con persoal propio e a súa vez, contratáronse catro empresas con ampla experiencia na organización deste tipo de eventos, ao ser necesario contar con persoal específico como por exemplo, cociñeiros, para o seu funcionamento.
Esta partida supuxo para as arcas municipais un total de 17.054 euros (IVE engadido) para as catro empresas que participaron no evento, polo que o importe das catro empresas xuntas non chega á cantidade necesaria que marca a Lei de Contratos para pasar polo negociado de contratación.
Á súa vez, con esta xestión directa, o Concello quixo "favorecer" ao sector marisqueiro local coa venda e promoción dos produtos extraídos da Ría de Pontevedra co traballo das tres confrarías mercando directamente na lonxa de Campelo dito produto, "incentivando deste xeito a economía de moitas familias que viven do sector marisqueiro no noso municipio".
En total, o Concello insiste en que a Festa do Mar supuxo un gasto de 176.051,28 euros. Tendo en conta a subvención outorgada pola Deputación de Pontevedra (11.000 euros), así como os ingresos acadados coa mostra gastronómica (49.633,50 euros), o evento supuxo para as arcas municipais un total de 115.417,78 euros.
O goberno municipal dá por amortizado este gasto pola repercusión e a promoción do municipio "non soamente dende o punto de vista turístico senón por exemplo favorecendo o consumo de produtos locais que repercute positivamente na economía do municipio". Ademais, aseguran que o custe actual está "moi por debaixo" do que tiña anos atrás.
"A Festa do Mar é para o equipo de goberno unha festa moi importante e fundamental. Segue a ser un evento moi exitoso e de notable repercusión algo que parece que o Partido Popular non lle senta nada ben", concluíu o concelleiro de Turismo.
Relacionadas:
-
O xuíz non ve indicio de delito na denuncia do PP contra o edil de Turismo de Poio
Por Oskar Viéitez |
-
O concelleiro de Turismo de Poio declarará nos xulgados por irregularidades na contratación na Festa do Mar
Por Mónica Patxot & Anxo Lourido |
-
Poio pon data á Festa do Mar e á Festa da Ameixa
Por Redacción |
-
O PP denuncia que o Concello de Poio perde máis de 150.000 euros na Festa do Mar
Por Redacción |
-
O PP asegura que o Concello de Poio ten facturas pendentes de pago por máis de 600.000 euros
Por Redacción |
-
Máis de 35.000 persoas pasaron pola carpa da XVI Festa do Mar
Por Redacción |
-
The Lakazáns, Siniestro Total, Terbutalina e Tractor Troy líana en Combarro
Por Diego Torrado |
-
Combarro levanta o pano da edición máis económica da Festa do Mar
Por Redacción |