Fernando Serrulla e Héitor Picallo, no Mes da Recuperación da Memoria Histórica de Cuntis
Por Redacción
A II Edición do Mes da Recuperación da Memoria Histórica de Cuntis continúa esta fin de semana con actividades venres e sábado que citarán na Casa da Cultura ao antropólogo forense Fernando Serrulla Rech e o historiador local Heitor Picallo.
Este venres 21 ás 20.30 horas Fernando Serrulla Rech ofrecerá unha conferencia na que abordará o proceso de apertura das fosas comúns da Guerra Civil Española e o traballo de recuperación dos restos das vítimas da Guerra Civil, ofrecendo un punto de vista diferente e pouco analizado até o momento.
Este sábado 22 ás 12.00 horas Héitor Picallo abordará a represión franquista en Cuntis e na comarca do Umia, con motivo do 80 aniversario do golpe de Estado de 1936 e consecuentemente do inicio da represión franquista. Picallo amosará toda a información recopilada durante moitos anos de investigación do sucedido en Cuntis neses fatídicos anos, e que serviu de moito á Asociación Cultural O Fervedoiro na recuperación da Memoria Histórica.
Ademais, desde este luns 17 de outubro está exposta na Casa da Cultura a exposición 'Exilio e Deportación: Joaquín Balboa e Antonio Pérez, de Monterrei e Boborás aos campos nazis', que aborda a historia deses dous galegos que estiveron presos durante a Segunda Guerra Mundial nos campos de exterminio. A partir deste luns 24 estará a exposición 'Crónicas da Represión Lingüística', de Xan Leira, que conta coa colaboración de Cultura da Deputación de Pontevedra, dentro dos actos organizados no Ano Castelao 2016.