Unha das acusadas do crime de Chancelas alega trastorno psiquiátrico ante o TSXG
Por Redacción
O Tribunal Superior de Xustiza de Galicia (TSXG) acolleu este martes a vista de apelación polo asasinato de Secundino Prego, o ancián de Chancelas (Poio) que morreu a golpes ás portas da súa vivenda. Foron condenadas polo crime dúas mulleres que o coidaban, pero tan só una delas decidiu apelar contra a sentenza da Audiencia de Pontevedra.
Trátase de Rocío Gondar, condenada a 20 anos e medio de prisión polo crime. O seu avogado asegurou, igual que fixo no xuízo inicial, que a moza foi diagnosticada en prisión dun trastorno límite de personalidade e dun trastorno histriónico de personalidade que a faría inimputable.
O letrado lembra que durante a fase de instrución rexeitouse a proba psiquiátrica que determinaría se era ou non imputable por estes feitos, polo que o seu dereito de defensa quedou vulnerado. Ademais, asegura que o xurado obviou este trastorno e a atenuante do medo insuperable que a outra acusada infrinxía na súa cliente.
Entende observou que non houbo "probas fundamentais" e pediu un novo veredicto ou o seu inimputabilidade por trastorno da personalidade, aínda que, en todo caso, tamén valora a posibilidade de que se recoñezan as atenuantes sinaladas.
A outra acusada, Albertina Táboas, optou finalmente por non apelar a sentenza e acepta os 22 anos de prisión que lle impuxo a Audiencia pontevedresa.
En todo caso, a Fiscalía pediu que se confirme a sentenza inicial, xa que considera que está "ben estruturada" e nela faise unha "exposición clara" dos feitos que acabaron coa vida de Secundino. Reitera que se fixeron "todas as probas" e que o xurado si tivo en conta un informe pericial que aludía a un trastorno da personalidade, "pero non límite".
A sentenza da Audiencia pontevedresa considera probado que as dúas mulleres "de mutuo acordo" mataron a Secundino entre as 22.15 e as 23.50 horas do 2 de febreiro de 2014, tras asaltar de forma "súbita e inesperada" a vítima no camiño de acceso á súa vivenda de Chancelas, sen que este puidese defenderse.
Golpeárono "repetidamente", máis de 18 veces -tres delas mortais de necesidade- cunha tixola, o seu propio bastón e unha pedra, ata acabar coa súa vida.
Tras iso, as dúas mulleres chamaron ao 112, á Policía Nacional e á Garda Civil finxindo que estaban a ser vítimas dun roubo para tratar así de encubrir o crime.
Albertina Táboas, que fora nomeada herdeira universal cinco días antes do crime a cambio de coidalo, "planeou" a morte do ancián para quedar cos seus bens "ante o temor de que puidese revogar o testamento" e ofreceu unha cantidade de diñeiro a Rocío, aceptado por esta, como recompensa para que lle axudase a matalo.
Relacionadas:
-
O Supremo confirma a condena para as asasinas de Secundino Prego en Chancelas
Por Redacción |
-
O TSXG rexeita que unha das condenadas polo crime de Chancelas teña un trastorno de personalidade
Por Oskar Viéitez |
-
O crime de Chancelas chega ao TSXG cunha vista de apelación solicitada polas dúas acusadas
Por Redacción |
-
Dura sentenza para as asasinas de Secundino, condenadas a máis de 20 anos de prisión
Por Alejandro Espiño |