Os corsarios volverán arrasar Marín
Por Redacción
Marín volverá celebrar esta fin de semana a súa Festa Corsaria, un evento no que os piratas volverán invadir a localidade durante a tarde do venres 19 e toda a xornada do sábado 20. O Concello xa está a ultimar todos os preparativos e lanzan unha petición a todos os asistentes, que o vestiario sexa acorde á temática e que tamén respecte este requisito quen instale postos.
A Festa Corsaria chega á súa quinta edición e ofrece animación e un completo programa de actividades que ten como epicentro a alameda Rosalía de Castro, aínda que os postos estenderanse ao parque Eguren, tratando de acoller ao máximo número de participantes.
Os organizadores premiarán ao local mellor ambientado e aos particulares que máis se esmeren na decoración dos espazos nos que organicen as súas comidas e ceas a partir do mediodía do venres.
Para poder instalar postos na Festa Corsaria, o requisito imprescindible é que sexan artesáns e cumpran as bases creadas para o devandito evento. A organización proverá a todos da toma de corrente, pero o resto corre a cargo do artesán.
O prezo para o artesán vendedor é de 45 euros por parada para os dous días, cun máximo de 2,5 por 3 metros de fondo, os dous días. En paradas con medidas superiores cobrarase 10 euros por metro lineal máis. Para lso restauradores o prezo será de 55 euros para as mesmas medidas e quen necesite dispoñibilidade de espazo poden poñerse en contacto coa organización a través do correo electrónico keplertyt@yahoo.es ou nos teléfonos 657625312 e 627270030.
Consulta aquí o programa completo e requisitos da festa.