Animada xornada de piragüismo no río Verdugo
Por Redacción
Unhas 200 persoas, segundo o Concello da Lama, participaron nunha nova edición do paseo gratuíto en piragua polo río Verdugo organizado polo goberno municipal, e que permitiu aos asistentes gozar dun espléndido día estival en comuñón coa natureza aprendendo nocións sobre a práctica deste deporte.
Os participantes, provistos obrigatoriamente de chaleco salvavidas e supervisados por monitores do Club de Piragüismo de Vilaboa, participaron por quendas desde as 17 horas, para facilitar un acceso máis organizado e equitativo entre as persoas inscritas nesta actividade que, con respecto ao ano pasado, superou con creces o índice de participación.
Os monitores expuxeron aos participantes os distintos modelos de piragua e diferenzas coas canoas e tamén as principais técnicas para facer máis eficiente a palada na auga.
Esta actividade está enmarcada dentro das actividades organizadas con motivo da Semana Cultural e pretende profundar en ofrecer alternativas de lecer diferente para as persoas, especialmente os máis novos, que cada vez se achegan en maior número á praia fluvial de Ponte Verdugo pola calidade das súas augas e as excelencias dos seus servizos.
A praia fluvial de Ponte Verdugo conta con zona arborizada, espazos de sol e de sombra, mesas e todo tipo de servizos que fan deste lugar un dos preferidos non só dos residentes e visitantes da Lama senón doutros municipios limítrofes.
Esta actividade permitiu tamén un maior goce do tempo libre familiar posto que esta iniciativa pretende favorecer tamén a interrelación xeracional a través da práctica de actividades saudables e de encontro coa natureza.
Relacionadas:
-
Se te achegas este luns á praia fluvial, terás un paseo gratis en piragua polo Verdugo
Por Redacción |
-
A Lama celebra con éxito a primeira edición da súa Festa Mexicana
Por Redacción |
-
Na Lama a calor combátese xogando
Por Redacción |
-
Nace Radio Nova, a radio municipal da Lama
Por Redacción |
-
Mariachis, poxas, comedia e tradición na Semana Cultural da Lama
Por Redacción |