Susto en Paxariñas polas dificultades para localizar unha vítima de violencia de xénero
Por Natalia Puga
Os responsables do servizo telefónico de atención e protección para vítimas da violencia de xénero de Cruz Vermella (Atempro) pasaron un mal rato este sábado cunha muller cuxa vixilancia teñen asignada. Nun momento dado, recibiron unha alerta do sistema e, cando tentaron contactar con ela para verificar se se atopaba ben, non o conseguiron, de modo que tiveron que pedir reforzos á Garda Civil para localizala. Finalmente, foi localizada na praia de Paxariñas, en Sanxenxo, en bo estado e sen vivir ningunha situación de perigo.
Todo ocorreu a última hora da mañá. O servizo inclúe un dispositivo de telefonía móbil e telecomunicación que permite que as usuarias poidan entrar en contacto en calquera momento cun centro de Cruz Vermella atendido por persoal especificamente preparado para dar unha resposta adecuada á súa situación e esta muller activouno, de modo que se interpretou que estaba a pedir axuda.
Este sistema de teleasistencia permite ao centro de atención ter controlada a localización da muller e, neste caso, o móbil situábaa na praia de Paxariñas. No momento no que se activou, tentaron contactar con ela vía telefónica, pero ela non respondía as chamadas, de modo que, para prestar unha correcta atención, desde Cruz Vermella contactaron coa Garda Civil de Sanxenxo para que lle axudase a localizala.
O operatiivo despregado levou aos axentes para percorrer a praia de Paxariñas, causando gran curiosidade entre os bañistas que non están afeitos a que unha patrulla da Garda Civil penetre na area. Finalmente, foi localizada e non se detectou que se atopase nunha situación de perigo. A Garda Civil comunicoullo aos responsables do programa de teleasistencia e finalmente concluíuse que a muller activara o sistema de forma involuntaria mentres gozaba dunha mañá de praia.
Unha vez máis, comprobouse o correcto funcionamento do programa Atempro, que ofrece unha atención inmediata e a distancia, asegurando unha resposta rápida ás eventualidades que poidan sobrevir ás vítimas de violencia de xénero as 24 horas do día, os 365 días do ano e sexa cal for o lugar en que se atopen. Mesmo cando é a última fin de semana de xullo durante unha xornada de lecer de praia.