Saneamento en Pazos e arranxos en lavadoiros de Cotobade grazas a unha axuda da Xunta
Por Redacción
O lugar de Pazos, na parroquia de Carballedo, verá completado o seu saneamento. Farao cos 48.000 euros que está a investir a Xunta nesa zona a través da liña competitiva do Fondo de Compensación Ambiental que puxo en marcha a Vicepresidencia.
Trátase do único lugar desta parroquia de Cotobade que, nestes intres, carece de rede municipal de saneamento que atenda a totalidade das vivendas veciñais, "aínda que os que se atopan na parte máis baixa, como na parte máis alta da parroquia, si que contan con saneamento que conduce as augas ata a EDAR de A Chan", explicou Jorge Cubela.
A intención ahora é rematar a área e dar servizo a todas as casas e, segundo o alcalde, desde o concello "estamos a realizar un gran esforzo nos últimos anos para sanear a totalidade das augas residuais que nos competen, xa que somos conscientes da mellora na calidade de vida e medioambiental que trae consigo, xa que os veciños poderán evitar continuar dependendo de fosas sépticas privadas".
Para a construción da rede estase a proceder á apertura de gabias no terreo localizadas ao longo de camiños municipais, sen interferir con propiedades privadas, ben levantando a solleira de formigón que existe nalgunhas zonas, ou ben o empedrado tradicional que volverá a ser colocado en disposición similar unha vez remate a obra.
Estanse a instalar colectores de PVC corrugado ao longo de 568 metros para saneamento de cor tella de 300 mm de diámetro. Tamén poranse 21 colectores con pozos de rexistro.
Agárdase que os traballos da execución deste saneamento rematen nun prazo de tres meses.
O proxecto conta cun investimento de 48.000 euros, dos cales 32.000 proceden da subvención da Xunta, que é o 80% do orzamento total, aportando o concello o 20% restante máis o IVE.
Ademais, este concello tamén está a levar a cabo obras de mellora e mantemento das fontes e lavadoiros de Cotobade grazas a esta mesma orde de axudas do Fondo de Compensación Ambiental de Vicepresidencia pero a través da liña non competitiva.
En concreto, executarase traballos de picado de xuntas en mal estado, rexuntado en cor gris ou similar, selado daquelas xuntas que se precisen para garantir a estanquidade de depósitos ou canles, instalación de valados de seguridade, sinalización, mellora de accesos e saneados das proximidades e novas cubricións. O orzamento é de 17.500 euros.
O obxectivo, explicou Cubela, "é realizar obras de conservación e mantemento para a posta en correcto funcionamento de varias fontes e lavadoiros que, nestes intres, se atopan en condicións de prestar un servizo de abastecemento axeitado aos veciños".
En concreto, actuarase sobre as fontes de Campodorna e Zica en Santa María de Sacos, Barbeitos en San Xurxo, e nos lavadoiros de Mansoliña e Regueiro en Tenorio.
Relacionadas:
-
A Xunta e o Concello de Cotobade asinan o convenio para mellorar o saneamento de Tenorio
Por Redacción |
-
13.000 euros para o saneamento dos lugares de Dorna, Vila de Abaixo e A Longa en Cotobade
Por Redacción |
-
Chegan aos concellos os cartos do Fondo de Compensación Ambiental e Infraestruturas
Por Redacción |