Poio recibe un préstamo de 73.000 euros da Deputación para investimentos
Por Redacción
Un total de 72.649,31 euros. É a contía do préstamo que asinaron este martes o alcalde de Poio, Luciano Sobral, e a presidenta da Deputación, Carmela Silva. Os cartos prestaranse sen xuro algún e servirá para financiar unha serie de investimentos no municipio.
Así, renovarase a instalación eléctrica e o cable estruturado do edificio do Concello, acometeranse diversas obras de mantemento e conservación do CEIP As Viñas e instalaranse semáforos na estrada PO-308 que une Chancelas e Combarro.
Poio é un dos sete concellos beneficiados pola convocatoria inicial do goberno provincial de préstamos sen xuros para os concellos de menos de 50.000 habitantes con destino ao financiamento de inversións, operacións de tesourería, necesidades urxentes ou desfases transitorios.
Neste exercicio 2016, por primeira vez a deputación provincial leva a cabo esta liña de créditos en réxime de concorrencia competitiva e sen ningún tipo de xuros para os municipios, que no anterior goberno se situaban no 2%.
Ademais de Poio, outros seis concellos -Catoira, Silleda, Salceda de Caselas, Pazos de Borbén, A Cañiza e Fornelos de Montes- se beneficiaron ata o momento desta iniciativa, que conta cun investimento de 1.137.708,7 euros.