O narco Florencio Groba volve sentar no banco dos acusados aos seus 63 anos
Por Redacción
A Sección Segunda da Audiencia de Pontevedra sinalou para o vindeiro xoves día 26 un xuízo por tráfico de drogas. No banco dos acusados sentarán dúas persoas que foron detidas ao ser descubertas no interior do seu vehículo nas inmediacións do poboado chabolista do Vao portando 150 gramos de heroína presuntamente destinada á venda.
O fiscal pide seis anos de prisión e multa de 30.000 euros para un deles (reincidente) e catro anos e multa de 20.000 euros para o segundo acusado, J. F. R.
O reincidente é un vello coñecido polas forzas da orde e pola cidadanía en xeral: o "histórico" narcotraficante ponteareán Florencio Groba Prego, que aos seus 63 anos arrastra seis sentencias condenatorias por tráfico de drogas ás súas costas.
Segundo o escrito de acusación da Fiscalía detállase que a heroína que adquiriron no Vao estaba valorada nuns 14.000 euros.
Como proba de que Florencio Groba tiña previsto destinala á venda a terceiras persoas, o Ministerio Fiscal sinala que no rexistro practicado na súa vivenda no lugar de Guláns, Ponteareas, localizouse unha balanza de precisión e bolsas plásticas similares ás utilizadas para elaborar "papelinas".
Ademais noutra vivenda súa, en Torneiros, os axentes acharon varios feixes de billetes que sumaban 7.288 euros, así como 17 aneis de ouro, once pulseiras, dúas cadeas, varios xogos de pendentes e colgantes de ouro que o acusado supostamente obtiña mediante a venda das sustancias estupefacientes.
OITO ACUSADOS DO SALNÉS
Simultaneamente á celebración desta vista, na Sala contigua correspondente á Sección Cuarta da Audiencia de Pontevedra está sinalado para os próximos días 24 e 26 de maio un xuízo por tráfico de drogas que sentará no banco a oito veciños do Salnés acusados de dedicarse á preparación e venda de sustancias estupefacientes.
O ministerio público pide pena de catro anos de prisión para todos, salvo para un reincidente, que solicita cinco, ademais das correspondentes multas.
Relacionadas:
-
A Audiencia impón o narco Florencio Groba outros seis anos de prisión por tráfico de heroína
Por Oskar Viéitez |
-
O seu compañeiro tenta exculpar ao narco Florencio Groba por un alixo de droga en O Vao
Por Oskar Viéitez & Mónica Patxot |
-
A Audiencia impón doce anos de prisión ao histórico narcotraficante Florencio Groba
Por Natalia Puga |
-
O arrepentimento dos seus compinches arrincona ao histórico narco Florencio Groba
Por Oskar Viéitez |