A Valedora do Pobo lembra ao PP que a lei dá a razón a Carmela Silva na súa regulación dos plenos
Por Oskar Viéitez
Creada e actualizada
Creada e actualizada
A Valedora do Pobo, Milagros Otero Parga, deu a razón á presidenta da Deputación de Pontevedra, Carmela Silva, respecto das queixas expostas polo grupo provincial do PP de Pontevedra polo funcionamento dos plenos. Foi a propia valedora quen informou deste asunto na rolda de prensa celebrada este mércores con motivo da súa visita institucional ao concello de Pontevedra.
Milagros Otero explicou que a presidenta da Deputación "o debate ten o dereito a organizalo como queira" xa que a lei lle ampara.
Os populares criticaban a actitude "ditatorial" da socialista Carmela Silva, durante as sesións plenarias, nas que "directamente elimina" o debate entre os grupos políticos ao quitar o dereito a réplica e limitar a participación nunha única intervención por asunto tratado.
Despois de acudir á lexislación vixente, a valedora sinalou que "efectivamente" a persoa que preside en cada momento o debate "ten o dereito de organizalo como queira", polo que "non hai motivo para recomendarlle ou decirlle que está facendo mal".
"Non hai motivo para recomendarlle ou decirlle que está facendo mal"
"Polo tanto eu non teño nada que dicir neso", reiterou a Valedora do Pobo, que acompañou á súa resposta unha "recomendación" apuntando que "sería bó, permitir ás persoas que están en representación da xente que falen na medida en que poidan falar", explicou.
"Eu penso, que para facilitar o mellor desenrolo democrático, e para que os representantes do pobo podan falar debería dárselle a posibilidade de falar", apuntou Milagros Otero "pero é liberdade, está no dereito de quen organiza, darlla ou quitarlla".
A valedora facilitou unha copia desta resposta aos medios de comunicación que literalmente di que "entendemos que se melloraría o debate facilitando a contradición de opinións mediante unha aplicación flexible da quenda de réplica cando o interese do asunto o requira".
Este mesmo mércores, a portavoz do grupo provincial do Partido Popular, Nidia Arévalo reiterou ante os xornalistas a súa denuncia polos "malos tratos contínuos e falta de democracia nos plenos" asegurando que é "vergoñoso como tratan aos deputados".
Da resposta da valedora, Nidia Arévalo resumiu que Milagros Otero "ven a advertirlle á presidenta que faga todo o posible para que o pleno teña un uso democrático".
RESPOSTA DO GOBERNO PROVINCIAL
O goberno de Carmela Silva amosou a súa satisfacción polo informe da valedora que "respalda a posición do executivo" da Deputación de Pontevedra, ao confirmar que "a lei está ao lado de todas as actuacións do goberno de Carmela Silva na regulación dos plenos".
O deputado socialista, Carlos Font espera que con esta resolución os deputados do PP "asuman dunha vez que perderon o goberno e empecen a traballar pola cidadanía da provincia, despois de todos os circos e o ruído que se dedicaron a montar en cada pleno".
SALA DE PRENSA
Os deputados do PP tamén se queixaban porque o goberno provincial lles impidía o uso da sala de prensa da institución, "escondendo" aos grupos da oposición nun espazo habilitado nun soto do edificio administrativo.
Atendendo ás fotografías que os populares entregaron á valedora "determinaban que non era un lugar adecuado" porque, entre outras cuestións, carecía de mobiliario, unha cuestión que xa foi corrixida nas pasadas semanas e da que Milagros Otero se felicitou.
Relacionadas:
-
O goberno da Deputación leva ao Pleno a aprobación dun novo regulamento
Por Oskar Viéitez |
-
Os cines de Pontevedra permitirán ás persoas con diabete acceder con mochilas grazas á mediación da Valedora do Pobo
Por Redacción |
-
Milagros Otero: "os meus obxectivos son a educación en dereitos e abrir a institución á cidadanía"
Por Oskar Viéitez & Mónica Patxot |
-
O PP abandona o pleno da Deputación en desacordo co "ditatorial" sistema de control da sesión
Por Oskar Viéitez & Mónica Patxot | Creada e actualizada
-
O PP quere "falar sen límites" nos plenos da Deputación
Por Oskar Viéitez & Mónica Patxot |
-
O PP denuncia ante a Valedora do Pobo o goberno da Deputación por retirarlle o dereito a réplica
Por Redacción |
-
Unha gran bronca provoca que o Pleno da Deputación se celebre a porta pechada
Por Oskar Viéitez |
-
Axitado pleno na Deputación con traballadores de Ence e os deputados populares abandonando a sesión
Por Mónica Patxot & Anxo Lourido |