A Xunta sorteou vivendas de promoción pública en Cotobade, Pontevedra, Ribadumia, Poio e Vilagarcía
Por Redacción
A Xunta sorteou este venres entre os inscritos no rexistro de demandantes varias vivendas de promoción pública. Trátase de vivendas usadas que foron recuperadas tras a renuncia dos anteriores adxudicatarios.
As vivendas vacantes que se adxudicaron emprázanse nos concellos de Cotobade (1), Pontevedra (2), Ribadumia (1), Poio (1) e Vilagarcía (1). En todos os casos queda conformada unha lista de espera para a adxudicación de futuras vacantes sen necesidade de iniciar o procedemento dende o principio, reducindo así os prazos de adxudicación.
As listas serán publicadas na web do Instituto Galego da Vivenda e Solo (IGVS) e nos taboleiros de anuncios dos concellos, dando aos interesados dez días de prazo para a presentación de alegacións ou reclamacións.
Paralelamente, os técnicos da Xunta comprobarán o cumprimento dos requisitos por parte dos incluídos na lista de adxudicatarios.