Un millar de ciclistas únese á Pedalada máis solidaria
Por Redacción & Diego Torrado
A Pedalada popular e familiar que xa se volveu tradicional cada mes de abril en Pontevedra recibiu este domingo un novo respaldo multitudinario. Ao redor de mil persoas acudiron á cita animados polo bo tempo e polo seu espírito lúdico e reivindicativo á vez, sendo especialmente destacable a presenza de nenos cos seus familiares adultos.
Desde a organización, Manolo Torres mostrouse "satisfeito" coa resposta dos pontevedreses, que este ano ademais serviu para "dar visibilidade ás dúas organizacións protagonistas", pois desde o Concello de Ponteveda e as organizacións Pedaladas e Masa Crítica quixeron dedicar a edición 2016 ás asociacións Asseii (Asociación Socio Sanitaria Educativa Inflamatoria Intestinal) e Amencer (Asociación de Atención á Parálises Cerebral e Afíns).
Persoas de ambas as asociacións participaron na Pedalada e, de feito, usuarios de Amencer con parálise cerebral que inicialmente anunciaran que tan só realizarían un tramo do percorrido, finalmente fixeron os nove quilómetros de todos os participantes, un circuíto que con saída e chegada na avenida Montero Ríos, pero que percorreu boa parte da cidade, incluída parte da Illa das Esculturas e o campus universitario.
A marcha, concibida para potenciar o uso da bicicleta nos desprazamentos pola cidade, estaba especialmente orientada ao público familiar e ese foi precisamente o predominante entre os participantes.
Doutra banda, dentro das actividades organizadas con motivo do Día Internacional da Bicicleta, que se conmemora o 19 de abril, esta semana continuará un ciclo de cinema coa proxección de 'Dias de Festa' (28 de abril, Casa da Luz), 'As Aventuras de Pee-Wee' (5 de maio, Casa da Luz) e 'A Terre a Bicyclette' (12 de maio, Casa da Luz).
Ademais, o día 28 está prevista ás 18.00 horas unha charla coloquio na Casa das Campás coa participación confirmada dos ex ciclistas Álvaro Piñeiro e Marcos Serrano; o presidente da Federación Galega, Juan Carlos Muñiz; o intendente da Policía Local de Pontevedra, Daniel Macenlle; e Juan José López Castro, tenente do destacamento de Tráfico da Garda Civil de Pontevedra. Estará moderada polo xornalista Ramón Mella.