Os atropelos na cidade, baixo mínimos: houbo 34 en 2015 e ningún con falecidos
Por Alejandro Espiño
A cidade de Pontevedra rexistrou un total de 34 atropelos en 2015, oito menos que o ano anterior. É, ademais, a cifra máis baixa do últimos seis anos. Este é un dos datos máis significativos que se recollen na memoria da Policía Local con respecto á sinistralidade entre os usuarios máis indefensos da vía pública, é dicir, peóns, ciclistas e motoristas.
Por cuarto ano consecutivo ningún pontevedrés faleceu vítima dun atropelo. Iso si, estes accidentes provocaron cinco feridos graves que recibiron atención hospitalaria, dous máis que en 2014. O resto dos sinistros deixaron 28 feridos leves -once menos que o ano anterior- e un accidente no que tan só houbo que lamentar danos materiais.
Os cinco feridos graves producíronse noutros tantos atropelos en Alameda, Raíña Vitoria, avenida de Bos Aires, Fernández Villaverde e Francia, esta última en Monte Porreiro.
A metade dos atropelos que se produciron en 2015, segundo a Policía Local, foron por distraccións ou falta de atención dos condutores. Só o 6% destes accidentes son imputables ao peón, ao cruzar a vía de forma irregular por zonas que non están habilitadas para iso.
De todos os atropelados, un terzo deles tiñan entre 30 e 50 anos. Só tres eran menores de idade. Ademais, un 62% das vítimas (24) foron mulleres.
ACCIDENTES CON BICICLETAS
Tan só un 4,62% do total de accidentes (792) que se produciron o ano pasado tivo unha bicicleta implicada
Os datos da Policía Local correspondentes a 2015 desvelan ademais que se produciron 35 accidentes de tráfico nos que estaba involucrada unha bicicleta, once máis que o ano anterior. Son, en todo caso, tan só un 4,62% do total de accidentes (792) que se produciron o ano pasado. Neles, houbo tres feridos graves e 23 leves. Aquí tampouco se rexistraron falecidos e en nove só houbo danos materiais.
En 23 destes accidentes xunto coa bicicleta houbo un turismo involucrado. A maior parte deles debéronse a distraccións ao volante ou por non respectar a prioridade de circulación. Pola súa banda, un peón só se viu afectado por un destes sinistros en dous destes accidentes, do mesmo xeito que no caso de autobuses ou outros vehículos.
Os feridos graves, dous ciclistas e un peón, sufriron os accidentes na avenida de Compostela, a avenida de Lugo e Fernández Ladreda.
ACCIDENTES CON MOTOS
No caso dos vehículos de dúas rodas a motor, en 2015 producíronse 73 accidentes. Son 19 menos que en 2014. As motocicletas estiveron involucradas en 48 deles, mentres que os 25 restantes foron protagonizados por ciclomotores. Neles, houbo catro feridos graves -fronte aos tres do ano anterior- e ningún falecido. Os feridos leves foron 24 e en 45 dos sinistros só houbo danos materiais.
Neste último caso, os feridos graves rexistráronse na rúa da Estrada, Hortas e Santa Margarita.
Relacionadas:
-
Tensión en Benito Corbal por un enfrontamento entre un condutor e un ciclista
Por Redacción |
-
A Policía Local atendeu unha media de 80 chamadas ao día durante 2015
Por Alejandro Espiño |
-
A Policía Local resolveu o pasado ano 55 conflitos entre pontevedreses mediante a mediación
Por Alejandro Espiño |
-
En Pontevedra, sabemos circular polas rotondas?
Por Oskar Viéitez |
-
No que vai de ano 30 ciclistas foron sancionados por Tráfico
Por Oskar Viéitez |
-
Pontevedra aumentará os controis antidroga aos condutores da cidade
Por Alejandro Espiño & Mónica Patxot |