Recollen sinaturas en Almofrei para que a Deputación mellore a estrada
Por Redacción
Os veciños da parroquia de Almofrei mantiveron unha reunión co alcalde de Cotobade, Jorge Cubela, para solicitarlle medidas que sirvan para instar á Deputación de Pontevedra a desbloquear a mellora viaria da estrada EP-0405, que comunica Almofrei con Xesteira.
Estes afectados iniciaron unha recollida de sinaturas por toda a zona reclmando o urxente inicio das obras e o alcalde manifestou o seu apoio a esta iniciativa. Jorge Cubela entende que a paralización da obra por parte da Deputación carece de xustificación e pretende castigar a Cotobade por "razóns políticas e sectarias".
Ante esta situación, o goberno local presentará no pleno do próximo xoves 31 unha nova moción reclamando a mellora e apoiarán esta solicitude coas firmas recollidas polos veciños.
Segundo sinala o goberno municipal, a obra leva parada once meses, desde que o anterior goberno da Deputación, do Partido Popular, procedese á aprobación definitiva do proxecto. Cubela entende que esta obra responde a unha demanda histórica dos veciños de Almofrei e de todo o municipio de Cotobade. O alcalde indica que só é necesario convocar a mesa de contratación, avaliar as ofertas recibidas e proceder á súa adxudicación para iniciar os traballos.