A plataforma veciñal da PO-504 traslada ao alcalde as súas reivindicacións para esta estrada
Por Redacción
Un paso de peóns á altura do tanatorio e rebaixar os elevados bordos que sustentan a sinalización do viario, invadíndoo na maioría dos casos. Son as dúas principais reivindicacións da plataforma veciñal da PO-504, a estrada entre Vilalonga e Sanxenxo, que mantiveron un encontro este luns co alcalde, Gonzalo Pita.
Os veciños consideran que estes pedestais de formigón, que xa provocaron algún accidente mortal, resultan extremadamente perigosos para ciclistas e motoristas, polo que solicitan a súa eliminación, pasando a sinalización a estar sustentada noutros soportes que non entrañen risco algún para os condutores.
Os representantes da PO-504 solicitaron ao goberno local que velen porque esta modificación inclúase na actuación que a Consellería de Infraestruturas sacou a licitación a mediados de xaneiro e que prevé a rehabilitación localizada do firme, mediante o fresado e reposición dos tramos deteriorados.
O goberno local comprometeuse a mediar para facer chegar as propostas veciñais á Consellería de Infraestruturas, a fin de que estas poidan ser tidas en conta.
Vanessa Rodríguez Búa, concelleira de Seguridade Cidadá, explicou aos asistentes á reunión que, de feito, xa lle foran trasladadas tanto por escrito como nunha reunión persoal coa titular deste departamento, Ethel Vázquez.
Con respecto ao paso de peóns á altura do tanatorio, a conselleira de Infraestruturas comprometeuse co alcalde de Sanxenxo a incluílo na sinalización horizontal deste viario en canto fose posible, polo que o goberno local confía en que estea integrada na actuación que se atopa en fase de licitación.
Relacionadas:
-
Ordenan retirar os saíntes de formigón da estrada PO-504
Por Redacción |
-
A plataforma da PO-504 pide a retirada da estrada das plataformas de formigón
Por Redacción |
-
O acceso ao tanatorio, máis seguro para os peóns
Por Redacción |
-
Piden á Xunta un semáforo na PO-504, á altura do tanatorio
Por Redacción |
-
Sanxenxo traslada á Xunta a petición de mellora de seguridade viaria nas Salinas, O Vinquiño e A Vichona
Por Redacción |