Os Reis Magos participarán nunha cabalgata e unha festa infantil en Poio
Por Redacción
O martes 5 de xaneiro os Reis Magos chegarán ao Concello de Poio xa pola tarde para participar na tradicional cabalgata percorrendo as localidades do municipio e nunha festa infantil que terá lugar no pavillón do CEIP Isidora Riestra da Seca.
A cabalgata realizará o percorrido habitual. Sairá da praza do Mosteiro sobre as 16.00 horas e fará paradas nas prazas e peiraos de Poio antes de chegar á Seca. Durante todo o percorrido distribuirán caramelos aptos para celiacos.
A comitiva real pasará por Campelo, Lourido, A Barca, San Salvador, San Xoán, Combarro, Samieira e Raxó. A chegada está prevista para as 19.00 horas ata A Seca e tamén se prevé que ás 17.00 horas fagan unha parada no parque de Costa Giráldez.
Mentres Melchor, Gaspar e Baltasar percorren o municipio, haberá unha festa infantil no pavillón do colexio da Seca. A celebración será entre as 16.30 e as 20.30 horas e será de balde e aberta a todo o público.
A festa contará con animación, inchables, obradoiros de maquillaxe de fantasía, globoflexia, manualidades, xogos populares (paracaídas, rá, aro, bolos celtas, xogos tradicionais, cruz en raia, o muíño...) e moita diversión e está previsto que ás 19.00 horas pasen por alí os Reis Magos e, ao rematar, haxa un espectáculo de maxia e humor: 'Historia de un Ilusionista!', do Mago Rafa.
Ás 18.30 horas, os representantes das asociacións integrantes do Consello Municipal de Cultura (SCD Raxó, SCD Samieira, Ateneo Corredoira de Combarro, Asociación Boureante de San Xoán e Asociación Vides Novas de San Salvador) e a presidenta do Consello, Silvia Díaz Iglesias, farán a entrega de premios do concurso de tarxetas de nadal 2015 aos gañadores. O premio consistente en diploma e agasallo conmemorativo e en 60 euros.
Estes son os premiados:
Parroquia de Samieira: Claudia Acevedo Pérez – CEIP ESPEDREGADA (6º Primaria)
Parroquia de Raxó: Fabián Bermúdez – CEIP Espedregada (9 anos)
Parroquia de Combarro: Agustín Torres Lores – CEIP ESPEDREGADA (infantil)
Parroquia de San Xoán: Silvia Villaverde Alonso – CEIP Isidora Riestra (Infantil)
Parroquia de San Salvador: Irene Chayán Calveiro, CEIP Viñas (5º E. P.) (autora da tarxeta seleccionada polo xurado como tarxeta de felicitación institucional do Concello de Poio para o Nadal 2015)
Relacionadas:
-
Melchor, Gaspar e Baltasar chegarán antes a Ponte Caldelas
Por Redacción |
-
Cava especial para nenos na festa fin de ano do Ludonadal de Poio
Por Redacción |
-
O Nadal chega a Poio cheo de actividades para todas as idades
Por Redacción |
-
Unha tarxeta deseñada por unha nena de dez anos felicitará as festas do Nadal en Poio
Por Redacción |