Nunca me rendo!!!
Por Redacción
Preguntan desde PontevedraViva: como viviches a Gladiator Race?. "En equipo. E tras unha afirmación tan simple hai unha experiencia que merece a pena vivir" e neste caso que contar. Somos os Party Runnis, un dos 95 equipos que concorreron a esta proba pioneira en Pontevedra. Aínda que no grupo somos algúns máis, para esta ocasión, once animámonos á aventura. José Vicente Martín, Juan Riveiro, Toño Rodríguez, José Tapia, Alejandro Pedras, Aique González, Marcos Rodríguez, Carlos Paz, Héctor Santaló, Marián Fontán e Marisa Ciordia; por votación unánime elas foron elixidas capitás, e para o seu descoñecemento e sorpresa, minutos antes da saída confirmáronas con senllos brazaletes vermellos.
A través de internet, redes sociais, e a narración dalgún dos Partys que xa a coñecían, iamos recompilando información sobre o que nos agardaba o 24 de outubro. A última semana o grupal de wasap era un fervedoiro, fotos, vídeos, datos dos medios de comunicación, bromas sobre como chegariamos, se chegabamos...
Día D. Milio, un dos Runnis, estrea o chat pasadas as nove e media: "Bos días gladiadores!". Aique comenta irónico "quen dixo que non chovía?". Seguen as bromas. Doce do mediodía, Tapia e Toño foron os primeiros en chegar e empezan a enviar fotos da saída e da primeira quenda de participantes. Imos fixando onde nos atoparemos antes da Hora H: 13.40.
13.30h. A escasos metros do punto cero, familias e amigos fotográfannos coas camisetas impolutas. Cristóbal, outro dos Runnis, vén desexar sorte. Último abrazo conxunto de ánimo. Cada un coas súas circunstancias persoais, as súas debilidades e as súas fortalezas, pero co espírito mosqueteiro: todos para un e un para todos. Integrámonos na saída entre os 180 gladiators da quenda.
Por diante: oito quilómetros e 28 obstáculos. Durante unha hora e 23 minutos atravesamos por xanelas unha parede de madeira, sorteamos neumáticos colgados, reptamos baixo arames con espinos, por gabias baixo o chan cubertas de alpacas de palla ou de plásticos cargados de auga; por tubos que terminan no río e puxemos a proba o equilibrio cal funambulistas, afortunadamente, non sobre arame.
Voltos á posición vertical, pasamos por encima de coches para despezamento, chan de neumáticos, subimos e baixamos empalizadas con ou sen axuda de cordas, corremos polo barro, cargados con sacos de area e con ladrillos, saltamos sobre lume, atravesamos gabias e colectores cheos de auga, ou o mesmo río sobre colchóns. Á maioría resistíusenos a proba de puntería consistente en meter nunha barra horizontal un neumático de bicicleta; ou atravesar unha estrutura metálica colgados dos brazos. A organización penalizaba non superar os obstáculos con vinte burpees en cada caso, así que tocou volver tocar chan.
De regreso á verticalidade, as escaladas viñeron en forma de redes ou de estruturas de madeira, con maior e menor dificultade dependendo a súa inclinación, altura ou superficie. Sen dúbida, a proba que máis público congregou e a máis dificultosa, resultou ser a que levaba a escalar unha rede ata alcanzar a ponte de madeira da Xunqueira e lanzarse á auga ata alcanzar a beira. En definitiva, unha considerable descarga de adrenalina que continuaba unha vez atravesada a meta e colgada do pescozo a medalla de Gladiator.
Volvendo ao principio. Vivimos a gladiator en equipo: cantando nos tramos de carreira, animando e acirrando aos atrasados, quitando medos e temores, socorrendo nos momentos de fraqueza, exercendo de improvisados masaxistas cando os xemelgos xogaban unha mala pasada, ofrecendo mans, brazos e o corpo enteiro para axudar ao compañeiro.
"Nunca me rindo. Nunca renuncio ao meu camiño"
"Nunca me rendo. Nunca renuncio ao meu camiño. Sempre me acompaña a miña forza. A miña constancia e as miñas ganas de chegar máis lonxe. Só así xulgo o que rendo". É o lema das camisetas que esperaban na meta.
Valores en definitiva, en primeira persoa do singular ou do plural, que tanto se demandan e tan pouco ofértanse na actualidade. Gladiators Party Runnis! Auhhh, auhhh, auhhh!!!!
Relacionadas:
-
Os terreos de Tafisa e o Miradoiro de Monte Porreiro, novos espazos para a Gladiator Race
Por Redacción |
-
Máis de 2.300 inscritos para a segunda edición da Gladiator Race
Por Redacción |
-
Vilagarcía apúntase ás carreiras de obstáculos cun evento baixo teito en Fexdega
Por Redacción |
-
A segunda edición da Gladiator Race de Pontevedra abre inscricións
Por Redacción |
-
A Gladiator Race anuncia unha segunda edición en Pontevedra para o próximo 4 de xuño
Por Redacción |
-
Castor Salgado e Andrea Montero, os aventureiros máis rápidos da Gladiator Race de Pontevedra
Por Alejandro Espiño & Diego Torrado |
-
Chega a Gladiator Race: a Illa das Esculturas, territorio só apto para aventureiros extremos
Por Alejandro Espiño |