Alumnos da Escola de Gaitas reclaman a Carmela Silva a continuidade do centro
Por Alejandro Espiño
Enfadados por unha decisión que non comprenden e preocupados polo seu futuro. Así se atopan os alumnos da Escola de Gaitas e Percusión, un centro de formación musical que ata o curso pasado contaba con sedes en Pontevedra, Cangas, Vilanova de Arousa, Lalín e Vigo. A decisión da Deputación de deixar de financiar a súa actividade, para o que destinaba 140.000 euros anuais, deixou aos seus preto de 700 alumnos nunha situación límite.
Moitos deles elixiron este sábado para levar as súas protestas ao Pazo Provincial. Alí presentaron por rexistro unha comunicación dirixida á presidenta provincial, Carmela Silva, no que solicitan a continuidade da escola porque "a estas alturas es imposible organizarse", explica Susana Arbilla, unha das alumnas afectadas no centro de Pontevedra, "y no nos ofrecen ninguna otra alternativa para continuar nuestros estudios".
Para iso, abriron tamén unha petición a través da plataforma Change.org, que foi apoiada por case 3.000 persoas en apenas catro días.
Esta decisión deixa colgados a medio milleiro de alumnos que xa pagaron a súa matrícula para o próximo curso e que agora non poderán recibir formación, así como a unha decena de profesores que quedan sen traballo. O motivo esgrimido pola Deputación é que o mantemento dunha Escola de Gaitas "non é unha competencia propia" da administración provincial polo que debería ser asumida polos respectivos concellos e que "non imparten unha educación regrada nin con título".
"Teníamos muchas esperanzas puestas en este gobierno y nos han cerrado las escuelas, no tenemos ni local de ensayo", explica Susana Arbilla. Neste sentido, os alumnos aseguran que "no nos importaría aportar mensualmente una cuota o colaborar en lo que ellos nos quieran sugerir". Pero teñen claro que a escola debe continuar "porque es muy difícil encontrar un centro donde estar desde niños de 7 años a gente de 80, unos con conocimientos de música y otros no".
Ademais, durante esta concentración na avenida de Montero Ríos, quixeron contestar a varios colectivos de gaiteiros que celebraron o peche desta escola ao entender que o seu modelo de formación musical non era o adecuado e promovía unha cultura diferente á galega. Neste sentido, os alumnos aseguran que nesta escola "jamás se ha tocado una gaita o una pieza que no sea tradicional gallega" e que todo o repertorio que interpretan é o de Casto Sampedro.
Nos próximos días solicitarán tamén unha entrevista co alcalde de Pontevedra, Miguel Anxo Fernández Lores, para explicarlle a situación na que se atopan "como amante de la música que sabemos que es", concluíron neste acto de protesta.
Relacionadas:
-
A Deputación "non pecha as Escolas da Banda de Gaitas"
Por Redacción |
-
Menos touros e máis vacas
Por Oskar Viéitez |
-
Representantes da Escola de gaitas queren reunirse con Carmela Silva e con Fernández Lores
Por Oskar Viéitez |
-
O PP solicita que manteñan a Escola de Gaitas da Deputación
Por Redacción |
-
A Deputación deixa de financiar a Escola de Gaitas
Por Oskar Viéitez & Cristina Saiz | Creada e actualizada