O novo plan de emprego da Deputación duplicará o salario que recibirán os seus 1.550 beneficiarios
Por Alejandro Espiño
O que recibían ata o de agora os beneficiarios do plan de emprego impulsado pola Deputación de Pontevedra eran "salarios de miseria". Así de contundente se mostrou este mércores a súa presidenta, Carmela Silva, que avanzou os detalles dunha remodelada iniciativa laboral que será "respectuosa coa dignidade das persoas". O novo plan, dotado con máis de tres millóns de euros, dará emprego ata final de ano a 1.550 pontevedreses.
Este "cambio radical" que, segundo Carmela Silva, experimentará a aposta da Deputación para fomentar o emprego e loitar contra a precariedade laboral terá dúas importantes novidades. Fronte a xornadas de 25 horas e salarios de "máis ou menos 400 euros", os contratados pasarán a traballar 35 horas semanais e cobrarán "máis de 900 euros". Así se aprobará no pleno provincial que se celebrará o próximo 25 de setembro.
"Non queremos un emprego precario senón traballo de calidade e con dereitos", explicou a presidenta, que insistiu en que "o desemprego e a precariedade no traballo é o problema mais importante ao que nos enfrontamos". Ante esta situación, dixo, as administracións deben ter as políticas de emprego como un eixe fundamental cando, ademais, facilitan que os concellos sigan prestando servizos básicos e respondan ás demandas dos cidadáns.
Os 1.550 postos de traballo do novo plan de emprego repartiranse en función da poboación. Aos concellos de ata 2.000 habitantes corresponderalles un total de 70 traballadores, 360 postos de traballo serán para os municipios de entre 2.000 e 5.000 habitantes, o mesmo que para os concellos de ata 10.000 habitantes. Os municipios de entre 10.000 e 20.000 contarán con 450 novos traballadores, outros 238 empregos repartiranse entre os concellos de entre 20.000 e 50.000 habitantes e 72 traballadores serán para os municipios de máis de 50.000.
A presidenta da Deputación tamén adiantou que o goberno provincial xa traballa para que os programas de emprego de 2016 sigan os mesmos criterios e condicións laborais que as deste renovado plan que sairá adiante o próximo día 25.
Relacionadas:
-
A Deputación ocupa a máis de 1.500 persoas co último Plan de Emprego aprobado
Por Redacción |
-
Quince pontevedreses traballarán para o Concello durante dous meses co Plan de Emprego provincial
Por Redacción | Creada e actualizada
-
O PP critica ao goberno provincial por "vender" os programas de emprego de Louzán
Por Redacción |
-
O PSdeG-PSOE propón destinar 500.000 euros para complementar o plan de emprego da Deputación
Por Redacción |
-
Santos Héctor di que o PP na Deputación "perdeu o rumbo e elixiu a un voceiro que é a voz da caverna"
Por Redacción |
-
O PP critica que só dure dous meses o "Plan Carmelita" de emprego da Deputación
Por Oskar Viéitez |
-
A Deputación intentará mellorar as condicións dos bolseiros nun novo plan de emprego
Por Oskar Viéitez |