Ence quere compartir a calor que lle sobra
Por Mónica Patxot & Oskar Viéitez
O director de Operacións de Ence en Pontevedra, Antonio Casal, anunciou este mércores a vontade da empresa de compartir coa cidadanía a enerxía térmica excedentaria do complexo industrial de Lourizán.
Un exemplo desta posta en común dos recursos é o uso que a día de hoxe goza a Fundación Rías do Sur para o quecemento da auga da piscina olímpica de Ponte Muiños. Esta calor supón un aforro de 150.000 euros anuais para a fundación.
As adecuacións previstas na fábrica pontevedresa para os próximos anos permitirán liberar enerxía térmica polo que Antonio Casal indicou que "podría ser interesante analizar, conjuntamente con las administraciones públicas, la búsqueda de nuevos usos para este calor excendentario".
Antonio Casal e o xefe de Calidade e Medio Ambiente de Ence en Pontevedra, Carlos Casas de Ron, anunciaron en rolda de prensa que está previsto investir 8 millóns de euros nos próximos dous anos para a conclusión dos plans de eliminación de cheiros e vapores. Este diñeiro súmase aos 8 millóns xa destinados no últimos cinco anos a este mesmo obxectivo.
Segundo os seus datos, no ano 2010, o "impacto oloroso" da actividade da pasteira podía ser apreciado, como media, durante 140 minutos ao día (4.200 minutos ao mes), con todo, aseguran que a día de hoxe ese impacto é de menos dun minuto ao día (29 minutos ao mes). "Aún es demasiado, nuestro objetivo es olor cero", afirmnó Antonio Casal.
Para "continuar avanzando" nestes obxectivos Ence prevé modificar os seus sistemas de conducción de vapor e de gases existentes na fábrica e instalar, ademais novos equipos.
En canto á redución de partículas emitidas por Ence á atmosfera, aseguran que se reduciron no último trienio (2012-2014) en máis dun 37%.