Temporal sen apenas incidencias en Pontevedra, pero ollo! A Xunta amplía a alerta laranxa
Por Redacción
A xornada deste martes 15 saldouse con diversas incidencias na contorna de Pontevedra coa caída dunha cornixa na Residencia da Terceira Idade de Campolongo, o desprendemento de baldosas en Ernesto Caballero ou a caída dunha árbore no polígono do Campiño.
No caso do turismo foi necesaria a intervención dun guindastre e dos bombeiros do Parque de Pontevedra, ademais acudiron ata o polígono industrial membros de Protección Civil e da Garda Civil. O suceso saldouse sen feridos.
A alerta laranxa na provincia estenderase este mércores 16 a toda a comunidade galega. A Dirección Xeral de Emerxencias e Interior da Vicepresidencia da Xunta decretou que se manteña este nivel laranxa por vento. A Axencia Estatal de Meteoroloxía (AEMET) sinala que no interior de Pontevedra o vento pode chegar ao 100 km/h.
Esta situación levou a que a Comisión Escolar de Alertas suspendese as actividades escolares no exterior dos centros educativos durante a xornada deste mércores. Non se suspende, con todo, a actividade docente nin o transporte escolar.
No caso de que as circunstancias meteorolóxicas en Pontevedra levasen un risco superior ao previsto, os directores poderán adoptar as decisións oportunas respecto das actividades no exterior ou as extraescolares.