Música e gastronomía, eixes centrais da XXVIII Festa da Ameixa de Campelo
Por Redacción
Os vindeiros 19 e 20 de setembro Campelo volverá a acoller unha nova edición, a vixésimo oitava, da Festa da Ameixa. Para iso, o Concello de Poio está a ultimar os preparativos da ampla programación que porá en escena durante os dous días.
Despois de verse na obrigación de trasladar esta cita gastronómica a setembro por mor da toxina, desde o goberno municipal aseguran que como sempre a ameixa continúa a ser a protagonista indiscutible deste evento gastronómico, que naceu no ano 1988 para promocionar a calidade deste prezado molusco e actividade marisqueira do municipio.
O sábado 19 de setembro, ás 12.30 horas, terá lugar a inauguración da festa coa apertura da carpa de degustación e a inauguración da exposición fotográfica “Do mar á terra” realizada pola poiense Laura Domínguez Couselo.
Ás 13.00 horas actuará o grupo folclórico Vides Novas e a tardiña, ás 20.30 horas, celebrarase a homenaxe ás mariscadoras coa actuación da Coral Virxe de Fátima e a Escola de Música Tradicional de Poio. O día rematará coa verbena amenizada pola orquestra Gran Vía ás 23.00 horas.
Xa o domingo 20 de setembro, ás 11.30 horas haberá un pasarrúas e un concerto a cargo da Banda de Música de Arcade que dará paso a apertura da carpa gastronómica ás 12.30 horas. O certame de bandas de gaitas será ás 18.30 horas e o fin de festa será, ás 22.00 horas, coa verbena da orquestra Pasarela.
Relacionadas:
-
Á mariñeira, con fideos ou con fabas: a 'ameixa' volve triunfar en Campelo
Por Redacción & Cristina Saiz |
-
A Festa da Ameixa máis 'tardía' prevé servir en Campelo uns 500 quilos de ameixa da ría
Por Alejandro Espiño |
-
A Festa da Ameixa de Campelo celebrarase en setembro
Por Redacción |
-
Aprazan a Festa da Ameixa de Campelo ante o peche da ría para o marisqueo
Por Redacción |