Aprazan a Festa da Ameixa de Campelo ante o peche da ría para o marisqueo
Por Redacción
A toxina que hai nos bancos marisqueiros da ría puido máis que as gañas de festa que teñen os veciños de Poio. Finalmente, a Festa da Ameixa de Campelo terá que ser aprazada.
Así se acordou durante unha xuntanza que mantivo este mércores o concelleiro de Turismo, Xosé Luís Martínez Blanco, coa agrupación de mariscadoras a pé, xunto con outros colectivos interesados.
O aprazamento do que ía ser a súa vixésimo oitava edición, que tiña previsto celebrarse os días 11 e 12 de xullo, decidiuse por unanimidade ao continuar a ría de Pontevedra pechada ao marisqueo e ante a previsión de prolongarse esta situación durante os próximos días.
O Concello de Poio e as asociacións implicadas na celebración do evento gastronómico entenden que ante a actual situación é imposible poder contar co produto protagonista do evento como é a ameixa babosa da ría de Pontevedra.
A celebración da Festa da Ameixa 2015 quedará polo tanto condicionada á apertura da ría, e neste sentido se están a barallar outras datas, non descartando a posibilidade de aprazar a festa ata o vindeiro mes de setembro, no caso de continuar a ría pechada ó marisqueo.
Dende a Concellaría de Turismo seguirán en contacto permanente co Instituto Tecnolóxico para o Control do Medio Mariño de Galicia (Intecmar) co obxectivo de estar pendentes de calquera cambio que se produza no estado da ría de Pontevedra.