Pontevedra insiste en transferir a Unidade de Drogodependencias á Xunta
Por Redacción
O Concello de Pontevedra, a través da concelleira de Benestar Social, Carmen Fouces, insistiu este xoves na necesidade de que se inicie "o antes posible" o expediente para transferir a Unidade Asistencial de Drogodependencias (UAD) de Pontevedra á Xunta de Galicia. Así se lles trasladou aos titulares da Consellería de Sanidade e da Federación Galega de Municipios e Provincias (Fegamp).
Na comunicación remitida a ambos organismos, o goberno municipal lembra que as competencias en materia sanitaria son da Xunta de Galicia e que en virtude da Lei 27/2013, do 27 de decembro, de Racionalización e Sustentabilidade da Administración Local modificouse a Lei de Bases de Réxime Local, acoutando as atribucións propias dos concellos co fin de evitar duplicacións competenciais entre administracións.
A UAD de Pontevedra presta asistencia a persoas con trastornos adictivos de trece concellos da comarca, unha función e un área territorial de actuación "que excede con moito as competencias municipais", segundo Fouces, ademais de supor unha carga económica moi grande para as arcas locais.
O convenio asinado no seu día polo Concello de Pontevedra e as consellerías de Presidencia e Sanidade non dá cobertura, recordan desde o goberno municipal, aos gastos que xera a UAD, "máxime cando a aportación autonómica recortouse máis do 25% entre os anos 2011 e 2014".
A concelleira de Benestar concluíu asegurando que a UAD é un centro de saúde que atende a persoas drogodependentes e como tal ten que formar parte da rede sanitaria do Servizo Galego de Saúde.
Relacionadas:
-
CC.OO traslada o seu "rexeitamento total" ao traspaso á Xunta da Unidade de Drogodepencia
Por Redacción |
-
Falta de acordo entre Concello e Xunta pola Unidade de Atención de Drogodependencias
Por Diego Espiño |
-
O Concello pedirá á Xunta que asuma o control do Centro de Atención a Drogodependentes
Por Redacción |