Costas ratifica a concesión de ENCE e sinala que o único que incumpre é o campo de fútbol dos Praceres
Por Oskar Viéitez
O servizo provincial de Costas ratificou a vixencia da concesión de Ence en Pontevedra no seu informe definitivo sobre a cuestión da caducidade da autorización estatal. Curiosamente o devandito informe declara a caducidade da concesión do campo de fútbol, situado ao lado da praza dos Praceres.
A alcaldesa de Pontevedra en funcións, Carmen da Silva, lamentou que Costas non tivese en conta as alegacións do Concello pero confesou que o goberno local non era "optimista" respecto ao futuro destas xa que "tanto dende o Goberno do Estado coma dende a Xunta levan tempo traballando para poder prorrogar a presenza de Ence na ría".
"Ao final son unha unidade de destino no universal", sinalou a alcaldesa en funcións respecto á presenza de ex conselleiros e ex ministros do Partido Popular no Consello de Administración de Ence.
Aclarada a vixencia da concesión, esta resolución de Costas permite que a dirección da empresa pasteira solicite ao Estado a prórroga da concesión.
A decisión política do goberno local é "facer todo o que estea nas mans do Concello para que Ence salga da ría", dixo Carme da Silva, e adiantou que os servizos xurídicos do Concello estudarán dende o punto de vista legal todas as opcións posibles para evitar esta decisión, pero ademais indicou que esta oposición tamén se manterá "dende o punto de vista social".
"Seguiremos batallando para que non se consolide isto", anunciou a alcaldesa de Pontevedra, antes de recordar que este ano hai eleccións xerais e que "as leis igual que se fan pódense modificar" para que a continuidade de Ence "non se perpetre".
Ademais do Concello de Pontevedra, colectivos ecoloxistas como a Asociación pola Defensa dá Ría ou Salvemos Pontevedra alegaron contra a vixencia do título concesional da fábrica de celulosa.
POSICIÓN DO PSdeG-PSOE
Pola súa banda, o avogado de Salvemos Pontevedra, e voceiro do grupo municipal do PSdeG no Concello de Pontevedra, Agustín Fernández, cualificou de "burla sanguenta" o contido deste informe ao dicir que o único que non xustifica a ocupación de dominio público marítimo terrestre incumprindo o título concesional é o campo de fútbol "paréceme de película de Almodovar", afirmou.
Agustín Fernández dixo ter claro que "aquí hai unha directriz política" para non ter en conta as cuestións técnicas "e a iso prégase o servizo provincial de Costas".
O edil socialista recorda que este asunto aínda ten percorrido xudicial.
Costas non aceptou as alegacións presentadas contra ningunha das instalacións industriais situadas dentro do recinto fabril de Lourizán, como son a planta de coxeración de enerxía eléctrica de biomasa, a planta de tratamento de augas residuais da fábrica ou as balsas de decantación.
"Non se pode ir contra a vontade dos cidadáns", indicou Agustín Fernández que valorou a decisión de Costas como unha "moi mala noticia para Pontevedra".
Relacionadas:
-
Augas de Galicia necesitará ampliar a superficie da EDAR de Praceres para "practicamente duplicar a súa capacidade"
Por Mónica Patxot & Oskar Viéitez |
-
ENCE estuda a construción en Pontevedra dunha nova planta de biomasa
Por Redacción |
-
A depuradora dos Praceres e o emisario submarino non teñen licenza de actividade
Por Oskar Viéitez |
-
Esixen á Xunta que se "posicione" e emita un informe desfavorable á continuidade de ENCE
Por Alejandro Espiño |
-
O goberno local cualifica de "crime contra a Ría de Pontevedra" a solicitude de prórroga presentada por ENCE
Por Oskar Viéitez |
-
Satisfacción na dirección e traballadores de ENCE pola resolución de Costas
Por Redacción |
-
Defensa da ría recorrerá a decisión de Costas de ratificar a vixencia da concesión de ENCE
Por Oskar Viéitez |
-
Costas responderá ás alegacións de Defensa da Ría sobre a contaminación ambiental de ENCE
Por Oskar Viéitez |
-
Mosquera fía a un cambio de goberno en Madrid a "única esperanza" de frear a ENCE
Por Alejandro Espiño | Creada e actualizada