Gonzalo Pita pide a Emerxencias o "máximo esforzo" para garantir a seguridade no verán
Por Redacción
O alcalde de Sanxenxo, Gonzalo Pita, mantivo este mércores un encontro cos integrantes do servizo municipal de Emerxencias, aos que lles pediu o "máximo esforzo" para garantir a seguridade no municipio durante o verán.
Tratouse dun contacto que se enmarca dentro da rolda de reunións que está a manter, acompañado da concelleira de Persoal, Vanesa Rodríguez, coas diferentes áreas municipais para presentarse e coñecer a través dos traballadores cal é a súa realidade laboral.
Gonzalo Pita agradeceu persoalmente o esforzo do equipo de emerxencias, que durante o pasado mandato, cubriron as baixas de compañeiros a cargo de horas libres.
Agora, o alcalde solicitoulles que manteñan a mesma implicación para que ns se produzan problemas de seguridade nos meses nos que a poboación de Sanxenxo se multiplica.
Ao igual que ocorrera con outros departamentos municipais, Gonzalo Pita emprazou aos traballadores a unha nova reunión no mes de setembro, na que analizar posibles axustes na organización laboral.