Un edificio da rúa de Forcarei, o primeiro en entregar o informe de avaliación dos edificios
Por Redacción
Un edificio situado na rúa de Forcarei é o primeiro de Pontevedra en presentar o informe de avaliación dos edificios, cumprindo así o previsto na ordenanza aprobada polo Concello o pasado mes de abril.
O concelleiro de Urbanismo, Antón Louro, asinou hai varias semanas a relación dos 295 inmobles que deben presentar o informe durante este ano. Trátase dos edificios que, conforme aos datos que obran en poder do departamento municipal, foron construídos antes de decembro de 1943. A listaxe será publicada nos próximos días na web do Concello e no taboleiro de anuncios.
O informe deste primeiro edificio, entregado nas oficinas do servizo de Disciplina Urbanística é positivo, e será tamén o primeiro en incorporarse ao rexistro creado para vixiar o cumprimento da ordenanza.
Por outra banda, o tenente de alcalde aclara que o informe de avaliación dos edificios pode ser presentado por calquera propietario (ou comunidade) con independencia da antigüidade. Conforme á lei estatal é preceptivo para a obtención de subvencións públicas para obras de rehabilitación.
Ao mesmo tempo, o informe inclúe o certificado de eficiencia enerxética de todas as vivendas e locais comerciais. Este informe é necesario para operacións de venda ou aluguer e resulta máis caro se cada propietario o realiza individualmente.
Finalmente, Antón Louro subliñou que esta avaliación dos edificios é un método moi aconsellable para comprobar o estado non só da estrutura ou a cuberta, senón tamén das instalacións eléctricas, de augas, gas e telecomunicacións. Moitas veces son estas instalacións as que xeran problemas de mantemento ou mesmo de seguridade, polo que cómpre realizar revisións preventivas.
A ordenanza de avaliación dos edificios afecta a todos os inmobles de máis de 50 anos de antigüidade. Obriga tamén a revisións periódicas cada 10 anos unha vez superada a primeira inspección. Todos eles deberán pasar esta revisión, dependendo da súa idade, en función dun calendario que se estende ata o ano 2018.
As inspeccións dos edificios son unicamente visuais e só no caso de detectarse deficiencias pode ordenarse algunha proba complementaria para determinar a gravidade. En caso de emitirse informe con recomendación de obras, os propietarios teñen dous meses para presentar a solicitude no Concello. O incumprimento das obrigas dá pé a apertura dun procedemento de disciplina urbanística por falta leve.