O local Centro Sur en Campolongo xa acolle as actividades das asociacións do sur da cidade
Por Mónica Patxot & Anxo Lourido
Varios colectivos sociais do sur da cidade xa ocupan o local coñecido como Centro Sur, un edificio situado nas antigas instalacións da Once, que acolle máis dunha decena de colectivos.
O alcalde de Pontevedra, Miguel Anxo Fernández Lores, visitou o inmoble reformado durante este mércores 22 acompañado polos concelleiros Carmen Fouces, Luis Bará e Demetrio Gómez. Á cita tamén acudiron representantes dalgunhas das asociacións que contan xa cun local no centro.
A Asociación Estrigueiras, Salcedo Norte, Amigos de Campolongo, a Sociedade Polifónica de Pontevedra, a coral do centro de Terceira Idade de Campolongo, Sociedade Antropolóxica Galega, o IGADI e o Fondo Galego de Cooperación Internacional dispoñen de espazos para o desenvolvemento das súas actividades tanto na planta baixa coma no soto. Pero ademais, está previsto que as asociacións do ámbito da discapacidade Juan XXIII, Amizade, Amencer e Xuntos tamén conten cunha situación nas plantas superiores cando se poidan acometer as obras, pendentes de licenza, segundo apuntou a concelleira de Benestar Social, Carmen Fouces.
O espazo conta cunha ampla sala multiúsos na que se instalaron dúas mesas de billar. Nela, o alcalde dirixiuse aos asistentes chanceando para indicarlles que estes centros buscan "que a xente se relacione e que cante ben" e engadiu que se levou a cabo un proceso complicado porque o inmoble se encontraba en malas condicións. Mesmo catro veciños de Amigos de Campolongo foron os encargados de instalar o chan antideslizante da sala multiúsos realizando os traballos ao longo dunha semana. Este cuarto, que conta con diversos ventanais, será destinada a charlas, reunións e a diversas actividades sociais. "Que xurdan moitos matrimonios reais e de conveniencia", comentou Fernández Lores ao referirse ao desfrute que espera que os usuarios obteñan das instalacións.
A zona visualmente máis atractiva atópase no museo da Sociedade Polifónica de Pontevedra situado no soto onde antes se atopaba a sala de planchado da Once. Alí se atopan dende retratos realizados por Laxeiro a un órgano da marca Gebrüder Link, pasando por fotografías dedicadas de Isabel de Borbón, dos reis Juan Carlos I e Sofía ou do actual monarca Felipe VI cando era Príncipe de Asturias.
O alcalde indicou que coa apertura do local do Burgo se completará a Rede de Centros Sociais do municipio.
Relacionadas:
-
"Ser un pobo de emigrantes dános unha sensibilidade especial para entender determinadas cousas, como a crise dos refuxiados"
Por Natalia Puga & Mónica Patxot |
-
A ONCE reactiva o seu convenio urbanístico co Concello de Pontevedra
Por Alejandro Espiño |
-
Portas abertas no Centro Sur
Por Redacción |
-
Sábado, xornada de portas abertas no Centro Sur de Campolongo
Por Redacción |
-
Pontevedra, capital da cooperación municipalista
Por Natalia Puga |
-
O traslado de colectivos sociais ao centro cívico de Campolongo, pendente dun trámite da ONCE
Por Alejandro Espiño |
-
Catro asociacións do ámbito da discapacidade 'capitanearán' o centro cívico de Pontevedra Sur
Por Alejandro Espiño |
-
As obras do centro cívico da zona sur concluirán no verán
Por Oskar Viéitez & Mónica Patxot |