Cotobade devolve a todos os seus traballadores a paga extra que perderon no 2012
Por Redacción
O Concello de Cotobade pagou nestes días as cantidades que non se lles ingresara a todo o persoal laboral e funcionarios do municipio trala obrigada retirada da paga extra de decembro no ano 2012.
Este pagamento, que xa fora aprobado nun pleno da corporación o pasado mes de outubro, beneficia a 19 traballadores. A contía a pagar polo Concello é de 6.460 euros.
Tal e como lles trasladara o alcalde, Jorge Cubela, aos representantes sindicais na mesa de negociación, este acordo plenario manifestaba a vontade de reservar a partida necesaria para devolver esta paga e non dispoñerse para outra cousa. Buscábase así poder aboar a retención dos 44 días que lle correspondía a cada traballador.
Unha vez que o Concello de Cotobade pechou as súas contas de 2014 cumprindo os parámetros orzamentarios con superávit e remanente positivo, sen conter ningún tipo de débeda, "podemos mirar aos ollos dos traballadores e devolverlle de forma rápida os seus cartos", manifesta Cubela.
O alcalde presume de que a xestión "seria, rigorosa e responsable" do goberno municipal é a que permite agora afrontar este pagamento.