Cotobade aumenta un 45% o investimento destinado á promoción do emprego
Por Redacción
Os orzamentos municipais de Cotobade para o ano 2015 inclúen un incremento do 45% no investimento destinado á promoción do emprego con respecto ás últimas contas aprobada para este ano. A partida pasará de 35.000 a 61.077,50 euros, segundo as contas que acaba de pechar o Goberno local.
O Concello fará uso das "limitadas competencias que ten a Administración local" en concepto de emprego para favorecer a diminución do paro nesta localidade, onde o alcalde, Jorge Cubela, mantén que o desemprego "segue a ser unha das principais preocupacións tanto dos veciños como do propio Goberno local".
Jorge Cubela explica a través dun comunicado que os novos orzamentos terán o emprego e o gasto social como principais piares co obxectivo de que a lenta recuperación que se detecta na macroeconomía "chegue tamén ao día a día dos veciños, facilitándolle o acceso ao emprego e a mellora dos servizos sociais". Así, incrementa a partida destinada a acción social, que pasa de algo máis de 166.000 euros a 185.340,07.
Os orzamentos do exercicio 2015 tamén inclúen unha redución da carga fiscal dos contribuintes mediante unha exención do IBI para aqueles inmobles, fincas e casas cuxa cuota tributaria sexa inferior a 10 euros. Esa medida suporá que no 2015 non se emitirán 9.331 recibos.
O alcalde asegura que os orzamentos manteñen o seu esforzo inversor, centrado en actuacións prioritarias de mantemento e mellora de servizos e infraestruturas, e continúan na liña de contención do gasto corrente e de persoal, "eliminando os gastos superfluos, e axudando aos veciños nas súas cargas fiscais".