Alianza y Barros suxire ao alcalde de Ponte Caldelas que faga municipal o servizo de tanatorio
Por Redacción
Un representante de Alianza y Barros, unha das compañías accionistas de Velatorio de Ponte Caldelas, S.L., sociedade propietaria do tanatorio que permanece pechado nesta localidade desde o mes de novembro de 2013, suxeriu ao alcalde do municipio, Perfecto Rodríguez, "que invista nesta ou noutra instalación para converter en público un servizo que hoxe depende exclusivamente do sector privado".
A funeraria considera "sorprendente" a decisión adoptada polo político de remitir unha carta ás dúas compañías acusándoas de manter unha "actitude de desprezo" aos veciños deste concello, "como se a actividade empresarial tivera as mesmas obrigas que a xestión pública e puidera rexerse polas mesmas variables", indica a funeraria nun comunicado remitido aos medios.
Estas mesmas fontes salientan que a "precipitación" de Rodríguez foi tal no seu día que incluso enviou a súa misiva a unha firma aseguradora que nada ten que ver coa propiedade do tanatorio, dependente dunha sociedade funeraria.
"Por suposto", Alianza y Barros "lamenta enormemente as molestias que o peche da instalación de Ponte Caldelas poida estar causando aos seus potenciais usuarios", pero lembra que nas decisións empresariais "non interveñen unicamente os intereses dos clientes, senón moitas outras cuestións". Neste caso, por exemplo, explica a empresa que a prolongación da inactividade no velorio deriva da "necesidade de determinar as responsabilidades pertinentes" en relación aos danos sufridos no inmoble a raíz do afundimento parcial do teito, unha cuestión a dirimir coas compañías de seguros.
"Se o Concello fai unha oferta pola débeda de Rías Baixas-Albia, non hai problema, mañá mesmo empezamos a arranxar o tanatorio", di Alianza e Barros
Ademais explica Alianza y Barros que, a outra compañía propietaria de Velatorio de Ponte Caldelas, S.L., en concreto, Servicios Funerarios Rías Baixas S.L.-Albia, "non atende as súas obrigas financeiras na empresa desde o ano 2011 nin como accionista nin cando fai uso das instalacións como cliente, o que condiciona calquera investimento neste momento".
O xerente de Alianza y Barros en Pontevedra, Fernando Gutiérrez, transmitiu persoalmente meses atrás a Perfecto Rodríguez todas estas consideracións durante un encontro mantido no Concello de Ponte Caldelas. Rexedor e directivo aclararon entón a controversia e acordaron manter un contacto máis frecuente para evitar novos malentendidos. Sen embargo, o alcalde volveu a criticar esta semana ás propietarias do velorio publicamente, "sen contactar antes con elas, e insistiu en responsabilizalas da prestación do que el parece entender como un servizo público", din no seu escrito.
"O único que no seu día fixeron as funerarias foi aproveitar unha oportunidade de mercado derivada da inexistencia dun servizo en Ponte Caldelas, unha oportunidade en boa medida xurdida polo desinterese municipal. Se Perfecto Rodríguez entende agora que se trata dunha actividade pública, entraría dentro das súas competencias, polo que o que tería que facer é prestar ese servizo, non agardar a que unhas compañías privadas lle resolvan a papeleta", indicou Gutiérrez. "Se o Concello fai unha oferta pola débeda de Rías Baixas-Albia, non hai problema, mañá mesmo empezamos a arranxar o tanatorio, á espera de que se aclaren as aseguradoras", concluíu.
Relacionadas:
-
Acordo para a reapertura do tanatorio de Ponte Caldelas
Por Redacción |
-
Unha empresa funeraria estuda construír un tanatorio no ámbito da zona urbana de Ponte Caldelas
Por Redacción |
-
O PSOE de Ponte Caldelas sinala ao alcalde como "máximo responsable de que os veciños non teñan onde velar os seus defuntos"
Por Redacción |
-
Perfecto Rodríguez di que as empresas propietarias do tanatorio "só pretenden confundir e marear a perdiz"
Por Redacción |
-
O PSOE de Ponte Caldelas comprométese a reabrir o tanatorio
Por Redacción |
-
Perfecto Rodríguez lamenta o "desprezo" aos veciños por parte das empresas que manteñen pechado o tanatorio
Por Oskar Viéitez |
-
O PSOE de Ponte Caldelas esixe responsabilidades ao alcalde polo peche do tanatorio
Por Redacción |
-
O alcalde de Ponte Caldelas recrimina ás empresas propietarias o peche do tanatorio
Por Redacción |