A Cámara de Comercio apraza por terceira vez a aprobación das súas contas anuais por falta de quórum
Por Natalia Puga
O Pleno da Cámara de Comercio de Pontevedra tivo que aprazar por terceira vez no que vai de ano a aprobación das súas contas anuais. Este xoves convocárase unha reunión plenaria na que figuraba este punto na orde do día, pero non chegou a celebrase por falta de quórum.
A aprobación das contas correspondentes ao exercicio 2013 xa se abordou en dous plenos anteriores nos meses de maio e xuño. Os números foron formulados e aprobados polo Comité Executivo do ente cameral, pero falta o trámite final, que lle dea visto e prace o Pleno.
O presidente da Cámara, Eduardo Barros, confirmou a falta de quórum e explicou que o Pleno se volverá a convocar próximamente, pero con máis tempo para garantir que acudan o número necesario de membros. Asegura que "la mayoría están dispuestos a aprobar las cuentas", pero que algúns se viron obrigados a faltar. Recoñece, iso si, a existencia de "un grupo beligerante y muy activo en la Cámara" que "entorpece" o seu funcionamento normal.
Ademais de ter que aprazar a aprobación das súas contas anuais, tampouco puido abordarse o informe de auditoría e a liquidación do orzamento ordinario de ingesos e gastos de 2013, formulado todo polo Comité Executivo. Eduardo Barros asegura que a falta deste trámite de aprobación non afecta ao normal funcionamento da entidade e que "se pueden aprobar más adelante", pero outras fontes consultadas recordan que o prazo habitual para aprobalas é o mes de xuño e que para seguir con elas nesta situación fai falta unha moratoria extraordinaria da Xunta de Galicia.
Entre os puntos da orde do día que tiveron que ser pospostos figura o nomeamento do representante da Cámara de Comercio no Consello de Administración da Autoridade Portuaria de Marín e Ría de Pontevedra, posto que actualmente ocupa Victor Nogueira García, segundo recolle a web oficial desta entidade.
Relacionadas:
-
A renuncia de dous empresarios de Pontevedra obriga a buscar vocais para a nova Cámara de Comercio
Por Natalia Puga |
-
O Consello de Contas detecta irregularidades da Cámara de Comercio na xestión de Pomovil e Ferpalia
Por Natalia Puga |
-
Dimisións e un Pleno imprevisto nunha 'desestabilizada' Cámara de Comercio
Por Natalia Puga | Creada e actualizada
-
García Costas avoga pola desaparición das Cámaras de Comercio de Pontevedra, Vilagarcía e Tui
Por Oskar Viéitez |
-
A Cámara de Comercio falla no segundo intento de aprobar as súas contas anuais por falta de quórum
Por Natalia Puga |