Viaqua compensará economicamente os seus clientes se incumpre os seus compromisos
Por Redacción
ViAQUA decidiu asumir cinco compromisos específicos orientados aos seus clientes, co obxectivo de ofrecerlles un maior e mellor servizo, nunha decidida aposta pola calidade, a eficiencia e a mellora constante.
Responsabilidade, Eficiencia, Proximidade, Precisión, e Profesionalidade, son os cinco compromisos que ViAQUA pon ao servizo do cliente naqueles concellos galegos nos que a empresa concesionaria xestiona o ciclo integral da auga.
En concreto, e a partir de agora, ViAQUA adquire o compromiso de Responsabilidade, polo que se obriga a instalar o contador nun prazo máximo de 24 horas, ao obxecto de que o usuario teña auga no menor tempo posible; o de Eficiencia, polo que remitirá unha notificación ao cliente se se detecta un exceso no consumo de auga esperado; o de Proximidade, comprometéndose a dar resposta ás reclamacións nun prazo máximo de dez días laborables; e os compromisos de Precisión e Profesionalidade procedendo, respectivamente, á rectificación de calquera erro de lectura na factura nun prazo máximo de seis días laborables, e a executar de xeito inmediato distintas xestións comerciais (cambio de titular da subministración, actualización do domicilio de correspondencia, actualización de datos bancarios, e emisión de duplicados de facturas).
Estes cinco compromisos poténcianse, ademais, cunha última esixencia como é a de compensar o cliente coa cantidade de 6 euros no caso de incumprimento, equivalente a uns 15.000 litros de auga. Unha cantidade que, pon de manifesto o grao de implicación da empresa coa calidade do servizo prestado os seus clientes.