As Noites Abertas comezarán antes que ningún outro ano: o 23 de xaneiro
Por Alejandro Espiño
O programa Noites Abertas chega cargado de novidades. A primeira, a súa data de inicio. Nunca antes comezou tan pronto. As súas actividades comezarán o próximo 23 de xaneiro e durarán tres meses, ata o 25 de abril. Isto é posible, segundo o concelleiro de Xuventude, Demetrio Gómez Junquera, porque o equipo "xa está engraxado". E por primeira vez non haberá interrupcións e as actividades non descansarán ningunha fin de semana.
En total, das 230 propostas recibidas seleccionáronse un total de 116. Moitas delas quedaron fóra por motivos de presuposto ou por problemas de espazo, pero son de gran calidade "e outros anos houbesen entrado sen problema", sinalou o edil.
Das elixidas, 30 teñen sido presentadas por asociacións e 16 por pequenas empresas. Pero a gran maioría, 70 delas, son propostas de mozos a título individual ou reunidas a través dalgún colectivo, algo que enche o Concello de Pontevedra de "orgullo e satisfacción". Segundo Demetrio Gómez, houbo unha época na que o movemento asociativo xuvenil era case inexistente e Noites Abertas "está contribuíndo a revitalizalo".
Trátase, en xeral, de xente "moi nova" e principalmente do Carlos Oroza e dos institutos A Xunqueira I, Torrente Ballester e Sánchez Cantón.
Na programación que se está a ultimar e que será presentada en próximas semanas, haberá tamén novas propostas. Entre elas, Demetrio Gómez destacou a iniciativa de 'speed dating', unha modalidade de citas rápidas; unha ruta nocturna en kaiak polo río Lérez ou, mediante a colaboración da Asociación de Xordos de Pontevedra, un curso para aprender a ligar mediante lingua de signos.
Outra das novidades é que Noites Abertas colaborará con outro dos principais programas municipais, o Salón do Libro Infantil e Xuvenil de Pontevedra. Actualmente, os equipos técnicos de ambas as dúas iniciativas traballan xa na coordinación das respectivas actividades.
Relacionadas:
-
O que se aburre na casa é porque quere
Por Diego Torrado |
-
Presentan a XVI edición de Noites Abertas, que chega este ano "máis grande que nunca"
Por Alejandro Espiño |
-
Xuventude explica o funcionamento de Noites Abertas a 1.500 estudantes de instituto
Por Redacción |
-
Empezan a xestarse as actividades da nova edición de Noites Abertas
Por Redacción |