Empezan a xestarse as actividades da nova edición de Noites Abertas
Por Redacción
Todas as entidades, asociacións, colectivos e grupos xuvenís e calquera mozo de Pontevedra interesados poderán participar dende esta mesma semana na elaboración de proxectos-proposta de actividades para a nova edición de Noites Abertas. A Concellaría de Xuventude abre o prazo de presentación de propostas e convócaos a todos a unha reunión informativa este mércores 1 de outubro no salón de actos do Pazo da Cultura. A cita será ás 19.30 horas.
O prazo para a presentación de propostas abrirase dende este xoves 2 ao 24 de outubro. No mes de novembro a coordinación do programa fará a selección das propostas definitivas, para pasar a unha nova fase de programación concreta das actividades seleccionadas, e configurar así o calendario definitivo para comezar máis cedo ca nunca, o venres 23 de xaneiro de 2015.
O Concello ofrece a oportunidade aos mozos de ser protagonistas do seu ocio participando activamente no deseño de actividades. Para o deseño de propostas, a coordinación do programa Noites Abertas dispón de modelos de formularios explicativos que pretenden facilitar o mecanismo para deseñar un proxecto, á vez que establecen a filosofía e os obxectivos do programa, os criterios de selección de propostas e o calendario que vai ter esta XVI edición do programa.
As propostas deseñadas poden ser de actividades deportivas, culturais, obradoiros de diverso tipo, rutas, xogos... sempre respondendo aos fins de Noites Abertas. O ano pasado recibíronse 232 propostas das cales saíron 117 actividades distintas e rexeitáronse 115. Este ano prevese un novo incremento dos proxectos recibidos.
Ademais, o concelleiro de Xuventude, Demetrio Gómez, e persoal do seu departamento manterán reunións informativas co alumnado maior de 16 anos de todos os IES públicos de Pontevedra co fin de explicarlles a posibilidade de presentar os seus propios proxectos de actividades para o programa e ser monitores do programa.
O modelo de formularios para deseñar propostas poderá descargarse da web da Concellaría de Xuventude ou solicitalo na Oficina de Xuventude na Casa Azul. O teléfono de contacto é o 986 840367 e o enderezo de correo electrónico xuventude@pontevedra.eu . A atención telefónica será só en horario de mañá, mais poderá concertarse entrevista noutros horarios para axuda e asesoramento no deseño das propostas.
Relacionadas:
-
As Noites Abertas comezarán antes que ningún outro ano: o 23 de xaneiro
Por Alejandro Espiño |
-
Xuventude explica o funcionamento de Noites Abertas a 1.500 estudantes de instituto
Por Redacción |
-
A próxima edición de 'Noites abertas' explotará as redes sociais
Por Redacción |
-
'Noites abertas' despídese da súa XV edición enchendo de festa a praza de Curros Enríquez
Por Diego Torrado |