Moreira propón reducir o custe das viñetas e do IBI rústico e aumentar as bonificacións para familias numerosas
Por Redacción
O equipo económico do Partido Popular de Pontevedra anunciou unha serie de medidas que permitirán reducir os impostos que terán que afrontar os pontevedreses no ano 2015.
A primeira desas medidas presentada polo refírese ao imposto sobre vehículos de tracción mecánica. Propoñen reducir un 25% o imposto coñecido como "viñeta".
Inclúese tamén neste apartado unha redución do 50% no imposto para os vehículos con motores con emisións inferiores a 100 gr/qm, de este modo premiará aos condutores que menos contaminen xa que se inclúe neste punto os híbridos e os eléctricos. Ademais, Moreira tamén propón rebaixar un 75% o imposto sobre os taxis, porque entende que "en la actualidad es el único transporte urbano que tiene Pontevedra".
Por outra banda, o Partido Popular puido comprobar que o Concello tan só recada 15.000 euros polo IBI rústico, polo que considera ineficiente que a Administración empregue esforzos en xestionar este cobro. Na actualidade, o Concello de Pontevedra mantén o límite de exención do imposto nos 12 euros. Moreira propón elevalo a 100 euros, co que se producirá practicamente unha supresión deste imposto e só pagaran os grandes propietarios.
En canto ao tipo de IBI urbano, o Partido Popular lamentou non ter marxe de manobra porque o goberno local non revisou a ponencia de valores dende o ano 2002, polo que a lei non lle permite reducilos. O que si permite a lei é unha serie de bonificacións para as familias numerosas e por iso o Partido Popular propón elevar esa dedución. Polo tanto, a bonificación a familias numerosas de categoría xeral pasaría do 10% actual ao 30%, e o referente á categoría especial situaríase no 50% en lugar do 30% que mantén o goberno local.
Ademais, o Partido Popular destinará a recadación das multas de tráfico á implantación do transporte público colectivo urbano.
E por último o Partido Popular propón unha bonificación do 50% no ICIO (Imposto sobre construcións, instalacións e obras) naquelas obras que favorezan as condiciones de acceso e habitabilidade para as persoas discapacitadas.