Conclúe a revisión dos 140 balcóns do concurso de decoración do centro histórico
Por Redacción
En apenas uns días coñeceranse os gañadores da primeira edición do Concurso de Decoración de Fachadas e Balcóns no Centro Histórico de Pontevedra. O xurado cualificador realizou este martes a última visita para valorar as 140 propostas estéticas realizadas polos veciños que se teñen inscrito nesta iniciativa da Concellería de Promoción Económica, Emprego e Turismo.
A comitiva, presidida pola concelleira Carlota Román, estivo integrada polo xefe do servizo municipal de Xardíns, Manuel Fontán, e os representantes das asociacións de veciños Santa María e San Bartolomé, xunto coa xerente do Centro Comercial Urbano Zona Monumental, Mónica Tomé.
Durante o percorrido, Carlota Román agradeceu o esforzo de todos os participantes, con independencia do resultado estético acadado por cada quen. Destacou que trátase dunha iniciativa pensada para enxalzar o atractivo turístico do centro histórico, pero que "también tiene un componente de autoestima para los propios pontevedreses".
Os tres gañadores recibirán un premio de 600, 400 e 300 euros, respectivamente.
Fóra de concurso participan dez institucións, entre as que están o Consello Regulador da DO Rías Baixas, o colexio San Xosé, o Arquivo da Deputación, a Delegación do Ministerio de Economía e Facenda, a Casa das Campás (Uvigo), a empresa pública de servizos agrarios da Xunta (Seaga), UXT e o Casino Mercantil e Industrial.