210 empresas pontevedresas optan ao certificado de Compromiso de Calidade Turística
Por Redacción
Un total de 210 empresas da provincia de Pontevedra aspiran a facerse co certificado de Compromiso de Calidade Turística no vindeiro mes de novembro.
Segundo indicou a Deputación de Pontevedra, este aumento do número de empresas comprometidas é froito da aposta que se está a facer dende Turismo Rías Baixas para consolidar a provincia como un destino turístico de máxima calidade. Outras 20 entidades optarán a esta certificación en maio de 2015.
Desde que Turismo Rías Baixas iniciou este labor, son 152 as empresas que obtiveron a antedita certificación e que optarán a renovala no vindeiro mes de novembro. A elas sumaranse as 47 adheridas nestes dous últimos meses ao Sistema de Calidade Turística Española en Destinos (SICTED) e outras 11 empresas que xa estaban integradas neste sistema pero que non puideran obter a certificación na pasada edición.
Das 58 empresas que optarán por primeira vez a obter a certificación antedita en novembro, o grupo máis numeroso é o de taxis, con 9 novas incorporacións; seguido de 6 restaurantes; e de axencias de viaxes, bares e cafeterías, empresas de turismo activo e hoteis, con 5 cada un. A eles súmanse 4 comercios, 3 aloxamentos rurais e outros tantos museos, 2 adegas, un albergue, un espazo natural protexido, 1 empresa de turismo industrial e 4 entidades de outros servizos.
Para que poidan conseguilo todas elas, a Deputación estalles a ofrecer formación, asesoramento, acompañamento e orientación, facilitándolle o cumprimento de todos os requisitos esixidos. Un deses requisitos é a cualificación por medio de diferentes actividades formativas que a Deputación porá en marcha desde o vindeiro luns 18 de agosto en Vigo, Lalín e Pontevedra.
Nestes primeiros cursos, persoal de 111 empresas da provincia poderán formarse en áreas como responsabilidade ambiental en turismo, benchmarking, xestión de negocio, diferentes modelos de xestión de calidade, manuais de boas prácticas, estratexias de servizo, lexislación aplicable no sector, xestión de queixas e suxestións, marketing turístico, as TIC aplicadas ao propio negocio, planificación da mellora de calidade, e o propio Sicted (ferramentas, métodos, métodos de enquisa).