Os sindicatos volven á rúa ante a preocupación polos últimos peches de empresas na comarca
Por Anxo Lourido
Os tres principais sindicatos, UGT, CC.OO. e CIG convocaron unha nova manifestación para reclamar medidas de creación de emprego e denuncian a empresa que, segundo afirman os seus responsables comarcais, se está a levar a cabo contra os traballadores e sindicalistas.
A marcha está prevista para este xoves 26 de xuño ás 20:30 horas. Sairá da Praza da Ferrería e, despois de percorrer o centro de Pontevedra, finalizará na Subdelegación do Goberno.
Esta mobilización que os tres sindicatos organizan unicamente en Pontevedra débese, segundo expuxeron os secretarios comarcais na presentación, á situación de importantes empresas da bisbarra como o peche de Montajes Novarue en Marín e a agonía que sofren entidades como Construcciones Crespo ou a fábrica de Tafisa en Ponte Caldelas. José Luis García Pedrosa, secretario comarcal de CC.OO., tamén destacou a gravidade da situación que atravesa Factoría Naval de Marín que se encontra en preconcurso de acredores. Segundo sinalaba, o peche de empresas de carácter industrial supón unha perda de emprego "que non se vai recuperar".
Ramón Vidal, secretario comarcal de UGT, indicou que esta protesta é unha chamada de atención cara ao Goberno central e cara á Xunta de Galicia para que cambien as súas políticas por supoñer "unha presión para vos traballadores" e sinalou que a modificación tributaria segue nesta mesma liña obrigando a que tributen as indemnizacións por despedimento improcedente.
Por último, Marcos Conde, máximo responsable comarcal da CIG, lamentou a situación de precariedade laboral en sectores como o da sanidade pública reducindo as substitucións durante o verán e criticou os plans de traballo como o da Deputación que, segundo expresou, serven para enmascarar os datos do paro.
Relacionadas:
-
Medio milleiro de persoas maniféstanse contra os últimos peches de empresas na comarca de Pontevedra
Por Redacción |
-
Os traballadores de Tafisa trasladan as súas protestas ante a sede central do grupo Sonae
Por Redacción |
-
Adían o último encontro entre dirección e traballadores de Construcciones Crespo
Por Redacción |
-
Montajes Novarue, unha empresa naval de Marín, pecha deixando 70 traballadores na rúa
Por Redacción |