Nauta Sanxenxo investirá máis dun millón de euros en rexenerar a praia de Carabuxeira
Por Redacción
O vicepresidente de Nauta Sanxenxo confirmou que a empresa pública que xestiona o Porto Deportivo Juan Carlos I recibiu xa o proxecto construtivo encargado co obxectivo de rexenerar a praia de Carabuxeira. Serán un total de 1.036.095 euros os que investirá a sociedade municipal nesta actuación que, segundo adiantou Salvador Durán, está previsto que comece tras a campaña de verán e que se estenda ao longo de nove meses.
De feito, o consello de administración de Nauta analizará a próxima semana este documento "para darlle o visto bo e licítalo o antes posible, unha vez estea acordada a liña de financiamento" explicou o edil, que o luns se reunirá co equipo redactor do proxecto para avaliar in situ a canalización dos regatos que desembocan en Carabuxeira a través dos diques.
O plan de execución foi realizado en función dun exhaustivo estudo da zona que incluíu a caracterización xeomorfolóxica da costa sanxenxina, describindo as praias da área e a batimetría; as dinámicas mariñas, en canto ao réxime de ondada, vento e nivel do mar; así como a propagación da ondada ata a costa, a súa metodoloxía, descrición e funcionamento. O proxecto expón tamén a evolución da liña de costa e recolle un diagnóstico da situación actual.
A solución proposta pasa por construír un dique principal
En virtude desta análise, a solución proposta pasa por construír un dique principal para conter a banda este da praia de Carabuxeira e facilitar o avance cara ao oeste aproveitando a configuración dos baixos rochosos, levando consigo deste modo o menor impacto posible. Así, a estrutura a levantar será un espigón rampla de case 100 metros de lonxitude composto por bloques prefabricados de formigón e que se irá adaptando á topografía ao descender de cota ata entroncar cos baixos rochosos.
En todo momento se garantirá que o novo recheo de area que se verterá en Carabuxeira quede a cota inferior á deste elemento xa que conforme a praia descende progresivamente de cota tamén o fará o espigón, que quedará mergullado durante a preamar. A súa superficie recubrirase con cachotaría de pedra co fin de embelecela e de que funcione como zona de fixación de novas comunidades biolóxicas.
Complementarase coa realimentación duns 24.500 metros cúbicos de area
Para dotar de maior contención á franxa á praia deseñouse un novo dique duns 62 metros de lonxitude, que nacerá na esquina oeste de Carabuxeira e terá unha aliñación paralela ao primeiro tramo do dique principal. O espigón estará conformado por un núcleo de formigón e recuberto por pranchas de cachotaría de granito de corte bruto.
Esta intervención, autorizada pola Dirección Xeral de Sostibilidade da Costa e do Mar, complementarase coa realimentación duns 24.500 metros cúbicos de area para garantir un ancho medio de 30 metros de praia e co acondicionamento da zona a través da demolición de antigas cimentacións e a retirada de canalizacións.
Relacionadas:
-
Acondicionan os accesos á praia de Carabuxeira, danados tralos temporais do inverno
Por Redacción |
-
Nauta Sanxenxo pedirá un crédito para financiar a rexeneración da praia de Carabuxeira
Por Redacción |
-
Os usuarios de Nauta Sanxenxo terán descontos do 50% nas tarifas de 58 portos internacionais
Por Redacción |
-
Os traballos para rexenerar a praia da Carabuxeira comezarán tras o verán
Por Redacción |
-
O Valedor dá a razón ao Concello polo arranxo dos danos do temporal en propiedades privadas
Por Redacción |
-
Sanxenxo inclúe na rexeneración da Carabuxeira as directrices do Ministerio
Por Redacción |
-
Medio Ambiente insta a Sanxenxo a construír un novo dique para rexenerar a praia de Carabuxeira
Por Redacción |