A Feira de Cuspedriños quere ser recoñecida como Festa de interese turístico de Galicia
Por Oskar Viéitez
O próximo domingo celebrarase a oitava edición da Feira de Cuspedriños, un evento consolidado no calendario festivo galego que aspira ao recoñecemento de Festa de interese turístico por parte da Xunta de Galicia.
O alcalde de Cotobade, Jorge Cubela, adiantou que a intención do concello é iniciar os trámites para acadar ese recoñecemento na rolda de prensa celebrada na sede da Deputación de Pontevedra e na que tamén participou a deputada Ana Isabel Vázquez e a concelleira de Cultura, María Pichel.
Cubela subliñou que a intención do concello é reforzar esta cita ineludible para os que queren viaxar no tempo ata mediados do século XX e mergullarse nos seus oficios e as súas tradicións nun ambiente de festa.
Porque a Feira de Cuspedriños, que se celebrará este domingo 8 de xuño, rememora o mercado agrogandeiro que dúas veces ao mes se celebraba neste lugar de Cotobade ata ben avanzados os anos 60 do século XX, converténdose no centro económico da comarca.
Hoxe, máis de 50 anos despois, o Concello de Cotobade conmemora ese evento cunha festa anual que busca, en palabras do seu alcalde, demostrar que Cuspedriños existe, e existe da mellor maneira posible, que é rememorando o que un día foi este pobo e poñendo en valor as tradicións, a cultura e a nosa identidade, estreitamente ligada ao rural.
Neste sentido, Ana Isabel Vázquez incidiu no poder de dinamización social, turística e cultural que teñen este tipo de eventos, que contribúen a difundir o patrimonio e os recursos dos concellos do interior da provincia.
A celebración conta con tres ingredientes clave:
- Ambientación de época: homes e mulleres, grandes e pequenos, acoden á celebración vestidos con traxes da primeira metade do século XX, como anima o alcalde a acudir, lembrando que haberá premios para as dúas persoas mellor caracterizadas; vehículos clásicos que comezarán a chagar a Cuspedriños en torno ás 12,30 horas coa colaboración da asociación de Amigos dos Vehículos Antigos; dous autobuses de época, que chegarán ao recinto ás 12,00 horas da man da empresa Cuíña; oficios antigos; coa presenza de afiador; fotógrafo; cego
- Comercio de produtos artesáns, ecolóxicos e de calidade, que abrirá de 10 a 19,00 horas con máis dunha vintena de postos nos que se poderán adquirir todo tipo de artigos: desde froita, pan, queixo, embutidos, viño, mel, textís;
- Música e actividades de lecer, xa que durante todo o día a festa estará amenizada por gaiteiros, pandereteiras, grupos como Os Trazantes de Tenorio, Os de Ningures, Catro Ventos, e haberá xogos populares, contacontos, obradoiros e manualidades, orientados aos máis cativos.
- Ademais, ás 17,00 horas haberá un desfile de traxes tradicionais galegos a cargo da Asociación do Traxe Galego e tamén haberá exposicións de cetrería da man da Asociación Galega de Cetrería.
TRES MIL PERSONAS
O alcalde de Cotobade subliñou que se trata dun programa ambicioso co que se pretende atraer o maior número posible de visitantes, que este ano calculan que acadará as 3.000 persoas.
Cubela quixo tamén agradecer o apoio das diferentes empresas e asociacións que colaboran coa festa, dos veciños e veciñas e da propia Deputación que financia practicamente o 80% dos custes da Feira de Cuspedriños, a través das axudas culturais.