Preocupación entre os traballadores ante a falta de noticias sobre a reapertura do Matadoiro
Por Oskar Viéitez & Mónica Patxot
Unha representación do equipo de traballadores do matadoiro de Pontevedra mantivo este mércores un encontro coa concelleira de Promoción Económica, Carlota Román, e as xefas dos servizos municipais de Contratación e de Promoción Económica.
Román expresou a súa solidariedade cos 17 traballadores afectados polo peche, ordenado pola Xefatura Territorial de Sanidade da Xunta o 30 de abril, e manifestou que tivo coñecemento da medida a través dos medios de comunicación.
O Concello abriu un expediente informativo á empresa Carnifex, concesionaria da instalación municipal, para coñecer o sucedido e poder tomar unha resolución. Ao tempo solicitou información oficial á Consellería de Sanidade, pero aínda non chegou ao Concello.
A Consellería mantén que o cesamento é temporal ata que se corrixan as deficiencias detectadas.
Os traballadores explicaron que o peche do matadoiro de Pontevedra obriga os seus usuarios a desprazarse aos de Cambados, Vilagarcía, Lalín, Nigrán ou A Estrada. E comentaron que reciben chamadas a diario por parte dos usuarios deste servizo interesándose pola reapertura das instalacións de Alba polas que a empresa paga ao Concello un canon anual de de 10.800 euros. En canto á súa situación persoal, todos os traballadores seguen en activo aínda que non teñan ocupación ao estar a instalación pechada.
Os traballadores tamén pediron a Carlota Román que reclamase por escrito á Consellería de Sanidade a relación de obras que a empresa debe realizar para que poida reabrirse a instalación. O equipo de Carnifex sostén que a acta que motivou o peche non detalla as deficiencias graves e que nunha reunión celebrada este martes, na Xefatura Territorial de Sanidade, tampouco llas concretaron.
A concelleira Carlota Román recalcou que na actualidade a actividade do matadoiro xa non é competencia municipal, e, polo tanto, o único que lle compete neste asunto é a relación administrativa cunha empresa que desenvolve a súa actividade nun edificio municipal.
Relacionadas:
-
O matadoiro inicia as obras para corrixir as deficiencias que levaron ao peche preventivo
Por Natalia Puga |
-
A empresa concesionaria do matadoiro entra en concurso de acredores
Por Oskar Viéitez |
-
O PP intentará actuar de mediador para desbloquear o peche do matadoiro
Por Oskar Viéitez |
-
A concesionaria do matadoiro presentará un ERE de suspensión para os 22 traballadores
Por Natalia Puga |
-
Sanidade retira o precinto da carne retida, pero mantén pechado o matadoiro
Por Natalia Puga |
-
Sanidade mantense á espera das analíticas para tomar unha decisión sobre o matadoiro
Por Redacción |
-
O goberno local indica que a Xunta continúa sen notificarlle o peche do matadoiro
Por Redacción |