Sanidade retira o precinto da carne retida, pero mantén pechado o matadoiro
Por Natalia Puga
A Consellería de Sanidade decidiu retirar o precinto que mantiñan dende o 30 de abril sobre unhas 100 reses gardadas nas camáras frigoríficas do matadoiro municipal ao constatar, nas exhaustivas análises realizadas, que reúne todas as condicións para ser comercializada. Non obstante, mantense de xeito indefinido o precinto das propias instalacións.
O voceiro da comisión de afectados polo peche do matadoiro, José Malvido, confirmou que as análises se recibiron ao longo da tarde deste martes e que a última hora representantes de Sanidade e da Policía Autonómica retiraron os precintos. Ás 21.30 horas aínda non se retirara ningunha carne.
"Sabemos que xa podemos empezar a recollela, pero non cando", explicou ao respecto Malvido. Segundo lles teñen trasmitido, a empresa concesionaria do servizo, Carnfex, ten previsto entregar este mércores toda a carne aos propietarios que así o desexen, pero algúns xa anunciaron que non a recollerán porque ainda que a sua calidade sea boa, empeorou con respecto a hai unha semana, cando a querían ter retirado. Pedirán indemnizacións por esas reses perdidas e polo resto de danos e prexuizos ocasionados polo precinto dos animais durante unha semana.
Preto de medio centenar de afectados reuniuse este martes co asesor legal e decidiron que emprenderán accións legais para que se depuren responsabilidades polo sucedido, pois non só perderon carne e encagos, senón clientes. Ata o momento non se decidiu se se presentará unha denuncia colectiva ou varias de forma individual, pois "haberá que estudar caso por caso, non todos tiveron as mesmas perdas e as mesmas consecuencias, os feitos foron os mesmos para todos, pero o que ocasionou non".
Asi, resaltan que non son iguais os problemas ocasionados a un particular que a un empresario ou gandeiro e chaman a atención sobre a "inxustificada" forma de actuar de Sanidade. Funcionarios autonómicos certificaran a calidade da carne, as pezas quedaron nas cámaras frigoríficas para ser retiradas con posteriroidad e, cando quixeron collelas, estaban precintadas "sen explicacións ninxustificación".
Os afectados sosteñen que dous departamentos distintos da Administración autonómica se contradixeron en toda esta polémica e ven corroborada esta versión dos feitos que manteñen dende o primeiro día porque na última semana se realizaron análises exhaustivas, mesmo se trouxo un reactivo especifico dende Alemaña e "todo deu negativo, a carne está ben e estaba ben dende ou principio".
Relacionadas:
-
A empresa concesionaria do matadoiro entra en concurso de acredores
Por Oskar Viéitez |
-
O PP intentará actuar de mediador para desbloquear o peche do matadoiro
Por Oskar Viéitez |
-
Preocupación entre os traballadores ante a falta de noticias sobre a reapertura do Matadoiro
Por Oskar Viéitez & Mónica Patxot |
-
A concesionaria do matadoiro presentará un ERE de suspensión para os 22 traballadores
Por Natalia Puga |
-
Sanidade mantense á espera das analíticas para tomar unha decisión sobre o matadoiro
Por Redacción |
-
Afectados polo peche do matadoiro denuncian "daños irreparables" e defenden a calidade da carne precintada
Por Natalia Puga |
-
O Concello abrirá un expediente á concesionaria do matadoiro tras o seu peche preventivo
Por Redacción |