Un novo servizo da Policía Local asesora as vítimas de accidentes de tráfico
Por Natalia Puga
As vítimas de accidentes de tráfico séntense en ocasións desconcertadas e descoñecen os seus dereitos e como son os pasos a seguir tras resultar lesionados para recibir a atención necesaria e correcta, en especial aquelas que por ser peóns ou condutores de bicicletas carecen dun seguro que os asesore en todo o proceso. Para axudar a todas estas persoas púxose en marcha un novo servizo da Policía Local de Pontevedra.
O servizo de asesoramento a vítimas de tráfico entrou en funcionamento xa no ano 2013, pero aínda non se difundira publicamente a súa asistencia. Durante os meses de vida que leva, os axentes adcritos ao servizo contactaron cun total de 14 persoas que necesitaron asistencia hospitalaria como consecuencia dun sinistro de circulación. Deles, catro eran peóns e o resto condutores de bicicletas (2) e de ciclomotor e motocicleta (2) e ocupantes de turismos (dous condutores e dous pasaxeiros).
O intendente xefe da Policía Local, Daniel Macenlle, explicou os detalles do servizo durante a presentación da memoria anual de actividade da Policía Local e indicou que para a súa posta en marcha se deseñaron dous protocolos de actuación, un interno para regular as accións dos axentes municipais e outro externo para fixar unhas normas básicas sobre como informar e atender ás vítimas, que contaron coa colaboración de Stop Accidentes e a Fiscalía de Seguridade Vial.
Ambos os dous parten da base de que cando un axente asiste a unha persoa que acaba de sufrir un accidente "o trato ten que ser esquisito", ten que ser "tratado coa maior delicadeza posible". A continuación, os policías aplican o protocolo de asesoramento, que regula como informar aos afectados dunha forma "clara e rigorosa" e aconsellarlles sobre como esixir, se o desexan, o cumprimento dos seus dereitos legais.
Os axentes insístenlles en detalles como a importancia de estar ben informado, o dereito a denunciar a tempo, o tempo para reclamar, o dereito a ser parte nun posible xuízo sobre o caso, a importancia de gardar facturas e documentos, como relacionarse coa compañía de seguros ou a existencia de asociacións de axudas a vítimas.
O servizo de mediación comunitaria policial mediou dende maio en 60 casos e conseguiu resolver 24
No ano 2013 tamén entrou en marcha un novo servizo da Policía Local, o de Mecop ou Mediación Comunitaria Policial, que dende o mes de maio conseguiu unha porcentaxe de éxito nas súas resolucións do 60%.
A concelleira de Seguridade Ciudadana, Carme da Silva, explicou que "os obxectivos están bastante por riba dos previstos", pois conseguiron resolverse con éxito 24 dos 40 casos abordados e "cuestións que podían chegar a maiores resolvéronse de forma pacífica", de modo que se mellorou a convivencia.
Daniel Macenlle explicou que forman o servizo un grupo de policías especialmente formados para estas mediaciones e para axudar aos veciños afrontar problemas que "poden ser problemas graves de non arranxarse a tempo". A petición dunha das partes implicadas, os axentes actúan e median ao estilo do "home bo ou veciño de ben" que había no rural pontevedrés anos atrás, unha persoa á que todos facían caso cando mediaba para solucionar problemas.
Ruídos, problemas nos tendais de comunidades de veciños, presenza de cans en domicilios ou discusións vinculadas co pagamento do aluguer son algúns dos casos máis frecuentes aos que se enfrontaron nos primeiros meses do servizo. 24 resolvéronse, tres foron rexeitados, dous non se solucionaron, en catro non se pode mediar e 7 seguen en tramitación.
Relacionadas:
-
Os xuíces pontevedreses permitirán resolver os asuntos de familia a través dunha mediación
Por Oskar Viéitez |
-
Detectan seis vehículos realizando tarefas de transporte escolar sen autorización
Por Natalia Puga |
-
O guindastre retirou 3.950 vehículos infractores en 2013, un 14% menos que no ano anterior
Por Natalia Puga |
-
Unha de cada dúas mediacións da Policía Local entre particulares acaba en acordo amigable
Por Alejandro Espiño |
-
A Policía Local recupera a figura do mediador para os conflitos entre veciños
Por Redacción |