Comeza a tempada de pesca de troita
Por Redacción
Na xornada deste domingo iníciase a tempada de pesca de troita nas augas cuxa competencia son da comunidade galega, un período que se prolongará ata o 31 de xullo.
Nos tramos de pesca sen morte (acoutados ou non) a tempada prolóngase ata o 30 de setembro, do mesmo xeito que nos coutos conveniados con entidades colaboradoras, nos que só se poderá practicar esta modalidade de pesca de captura e solta (nese período adicional desde o 31 de xullo ata o 30 de setembro).
As xornadas hábiles seguen sendo esta tempada todos os días, excepto os luns con carácter xeral e os xoves nos tramos acoutados. Nos coutos conveniados os xoves serán hábiles na modalidade de pesca sen morte.
No río Umia recupéranse as cotas tradicionais de 5 reos/10 troitas por pescador e día
Os horarios de pesca fíxanse de acordo co disposto na lei de pesca fluvial: desde unha hora antes do alba ata unha hora despois do ocaso, conforme ás horas oficiais publicadas na web de Meteogalicia, tomando como referencia a localidade máis próxima ao momento onde se estea pescando.
A talla mínima é de 19 cm e a cota máxima é de 10 troitas por pescador e día, manténdose as excepcións da pasada tempada.
O río Umia recupera as cotas anteriores ás medidas excepcionais adoptadas como consecuencia do vertido da Brenntag. Por mor deste vertido, as cotas estaban limitadas a 2 reos/5 troitas e recupéranse as cotas tradicionais de 5 reos/10 troitas.