Luis López denuncia o "ostracismo" por "razóns ideolóxicas" aos colectivos veciñais por parte do anterior goberno de Carmela Silva
![Oskar](/web/cache/scene/uploads/xornalistas/foto/b40/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/573b7bbf54-perfil.jpg)
Por Oskar Viéitez
O presidente da Deputación de Pontevedra, Luis López, manifestou que "o movemento asociativo e veciñal da provincia, no que respecta o apoio da Deputación, pasou oito anos nun ostracismo por razóns ideolóxicas", en referencia ao tempo no que a administración provincial estivo gobernada polo PSOE e o BNG e con Carmela Silva de presidenta.
Luis López fixo estas declaracións nunha comparecencia de prensa na que deu conta dos asuntos abordados este venres na Xunta de Goberno Provincial na que aprobaron a repartición de 1,6 millóns de euros no marco do novo Plan de Axudas para Comunidades de Usuarios de Auga, o "+ Aqua".
O titular da Deputación de Pontevedra destacou que "este goberno fixo o firme propósito de apoiar a todo tecido veciñal e comunitario da provincia", unha "aposta" que, segundo sinalou, viuse reflectida na configuración do seu executivo, creando Área de Acción Comunitaria, da que está á fronte o deputado Javier Tourís, e "lanzando dous plans" o Provincia Comunitaria, para asociacións de veciños, é o "+ Aqua".
"Recoñecemento, participación, sustentabilidade é unha nova forma colectiva de entender a construción da provincia", recalcou. "Existía unha necesidade real e crecente de apoio a estes colectivos que realizan un labor tan importante" e "a Deputación acertou coa súa aposta", engadiu.
Luis López dixo sentirse "abrumado" polas "expectativas e acollida deste plan" que forzou que na última modificación de crédito da Deputación destinásense 1,2 millóns de euros máis sobre os 2 que xa había no orzamento que entrou en vigor en xaneiro deste ano.
Na Xunta de Goberno deste venres aprobouse a repartición das axudas, que chegarán a 173 comunidades de usuarios de 43 concellos da provincial. Todas recibirán 10.000 euros, o máximo contemplado nas bases, excepto unha comunidade que percibirá 3.000 euros "ao esgotarse o crédito".
Con este diñeiro poderán realizar melloras no control e calidade da auga, actuacións de eficiencia ou rehabilitación, construír redes, impermeabilizar depósitos ou instalar pozos e canalizacións.
Ademais o presidente provincial ha anunciado que hoxe tamén se aprobou a ampliación do prazo de execución e xustificación destas axudas en seis meses, ata o 30 de maio.
OFICINA DE TRANSFORMACIÓN COMUNITARIA
Fóra dos asuntos da Xunta de Goberno desta semana, Luis López tamén anunciou que nun prazo de dúas semanas a Oficina de Transformación Comunitaria "+ Renovables" estará xa a pleno rendemento no Viveiro de empresas de Barro, para dar apoio a 59 concellos de menos de 50.000 habitantes da provincia neste proceso para impulsar a constitución de comunidades enerxéticas.
Nestes días próximos contrataranse cinco novos perfís técnicos para esta iniciativa. Ademais haberá unha oficina móbil para achegar os servizos de asesoramento a todos os municipios.
Relacionadas:
-
Recomendan aplicar funxicida natural ás viñas máis tardías ante a chegada das chuvias
Por Redacción |
-
Impulsan a creación de 45 prazas de estacionamento público gratuíto en Moraña
Por Redacción |
-
Xabier Díaz e Adufeiras de Salitre actuarán esté sábado na Alameda de Marín
Por Redacción |
-
Prevista a renovación do equipamento do ximnasio do Centro Deportivo Municipal
Por Redacción |
-
En marcha o arranxo do acceso ao campo de fútbol de Soutomaior
Por Oskar Viéitez |