Xa é oficial! A Escola de Cantería é un Centro integrado de FP
![Oskar](/web/cache/scene/uploads/xornalistas/foto/b40/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/573b7bbf54-perfil.jpg)
Por Oskar Viéitez
A incorporación da Escola de Cantería de Galicia, en Poio, á rede de centros integrados de FP xa é oficial. Así o notifica este venres o Diario Oficial de Galicia coa publicación do decreto que regula a súa creación como centro especializado no sector da edificación, a construción e a cantería.
Esta inclusión enmárcase na aposta do goberno galego por recuperar e potenciar o oficio de cantería, un dos máis antigos e representativos de Galicia. Neste sentido, refórzase a oferta formativa con catro novas titulacións para este curso 2024/25 que comeza, das cales dúas son ciclos duais e outra é unha titulación de alta especialización.
Trátase do ciclo básico en Reforma e Mantemento de Edificios, dos ciclos de FP dual en Construción e en Proxectos de Edificación e da titulación de alta especialización en Pedra Natural especializada en cantería, unha das 13 deste tipo que entran novas este curso en toda Galicia.
Todos os novos ciclos ofertados no Centro Integrado de FP de Cantería de Galicia vanse impartir, dado que contan xa con matriculados. Con todo, aínda hai prazas dispoñibles para potenciais interesados e a inscrición poderá formalizarse ao longo do mes de setembro.
REFORZO DOCENTE
O responsable de dirixir o centro nesta nova etapa conta cunha ampla experiencia na función directiva. Trátase de David Alvariño que foi, de feito, director do Instituto IES Frei Martín Sarmiento, de Pontevedra, durante oito anos.
No marco deste compromiso de reforzo do centro, a Xunta de Galicia tamén contratará máis profesores para impartir os ciclos e ofrecer unha boa formación a todo o seu alumnado.
Este impulso, tanto de oferta formativa como de profesorado, está motivado pola crecente demanda das empresas de contar con persoas que dispoñan das competencias necesarias para empregar as últimas tecnoloxías e materiais, co obxecto de ofrecer solucións innovadoras no eido construtivo.
Relacionadas:
-
Estrea do CIFP de Cantería de Galicia cun curso de formación para docentes
Por Redacción |
-
Críticas ao Concello por "non informar axeitadamente" sobre a recomendación de non bañarse na praia de Lourido
Por Oskar Viéitez | Creada e actualizada
-
A Escola de Cantería transfórmase nun centro especializado en edificación, construción e cantería
Por Redacción |
-
A Escola de Cantería de Poio incorpora catro novas titulacións tras a súa conversión nun centro integrado de FP
Por Redacción |