A área sanitaria recoñece un incremento de pacientes en Urxencias durante os últimos días
O xerente da área sanitaria de Pontevedra-O Salnés, José Flores Arias, recoñecía este martes o incremento de pacientes nos servizos de Urxencias do Hospital Montecelo, Hospital Provincial e Hospital do Salnés.
Flores Arias destacou que as urxencias continúan en cifras elevadas, un fenómeno xa detectado nas semanas previas, con un aumento do 5% en comparación co ano pasado.
Este luns 19 de agosto rexistrábanse 230 pacientes no servizo de Urxencias de Montecelo, 104 no Provincial e 185 no Salnés, números que manteñen a liña das últimas xornadas, segundo indicou o xerente.
Malia este incremento, o máximo responsable da xerencia subliñou que a maioría dos casos son patoloxías leves e que os ingresos hospitalarios seguen sendo similares aos de semanas anteriores, polo que a situación "non é alarmante".
Flores Arias asegurou que hai disposición de camas en todo momento nos tres hospitais da área sanitaria e que non se produciron atrasos nos ingresos.
Engadiu que se espera unha diminución das urxencias a partir desta semana, cando a poboación flotante e os visitantes que estes días permanecen nas Rías Baixas comecen a regresar aos seus destinos.
AMBULANCIA MEDICALIZADA
Por outra banda, a Xunta de Galicia garantiza que a ambulancia medicalizada desprazada a Sanxenxo durante os meses de verán regresará á súa base no Hospital do Salnés en Vilagarcía a partir do 1 de setembro, como vén sendo habitual.
O goberno galego desmentiu as acusacións do BNG, que afirmaba que o vehículo permanecería en Sanxenxo ata outubro, asegurando que tal información non se axusta á realidade.
A Xunta explicou que o desprazamento da ambulancia medicalizada a Sanxenxo durante xullo e agosto responde ao forte aumento de poboación na zona, e que esta medida está sustentada en estudos periódicos realizados pola Fundación Urxencias Sanitarias de Galicia-061.
Este ano, ademais, a reubicación temporal tamén se debe ás obras de mellora na base da ambulancia en Vilagarcía, que están a punto de concluír, indicaron.
Durante o verán, segundo as explicacións que se realizan desde a Consellería de Sanidade, a ambulancia medicalizada de soporte vital avanzado con base en Sanxenxo presta servizo non só a este concello, senón tamén a outros da comarca do Salnés, incluíndo Vilagarcía de Arousa.
A cobertura sanitaria complétase cunha ambulancia asistencial de soporte vital básico en Vilagarcía e outra de soporte vital avanzado en Pontevedra, garantindo a atención sanitaria na bisbarra.
Relacionadas:
-
Falece unha muller atragoada na Illa de Arousa entre queixas polo atraso na chegada da ambulancia
Por Redacción | Creada e actualizada
-
En setembro entrará en funcionamento a nova base da ambulancia medicalizada no Hospital do Salnés
Por Anxo Lourido |
-
Reunión en Barro para abordar a situación crítica da sanidade no municipio
Por Redacción |
-
Incremento significativo da actividade cirúrxica nos hospitais de Pontevedra e O Salnés neste 2024
Por Redacción |
-
José Flores, xerente da área sanitaria: "Non temos médicos de familia agora en paro para cubrir as vacacións dos titulares"
Por Mónica Patxot & Anxo Lourido |
-
Reforzo de catro médicos de Atención Primaria para este verán en Sanxenxo
Por Anxo Lourido |
-
En xullo trasladarán a Sanxenxo a ambulancia medicalizada con base no Hospital do Salnés sen data de volta
Por Anxo Lourido |